Kryetarja e Komisionit për Punë të Jashtme dhe Diasporë, Arbreshë Hyseni, ka dënuar me vendosmëri dhe pa mëdyshje aktet terroriste të kryera nga Hamasi ndaj Izraelit.
Përmes një letre, Hyseni tha se përdorimi i dhunës dhe shënjestrimi i civilëve është e neveritshme dhe barbare.
“Kjo përfaqëson terrorizmin në formën e tij më të tmerrshme. Komisioni për Punë të Jashtme dhe Diasporë rithekson mbështetjen e tij të palëkundur për Izraelin dhe solidarizohet me kombin dhe popullin e tij gjatë kësaj periudhe sfiduese”, thuhet në qëndrimin e këtij komisioni.
Më tej, në letrën e Komisionit për Punë të Jashtme dhe Diasporë thuhet se Izraeli, si çdo komb tjetër sovran, ka të drejtën për vetëmbrojtje dhe përgjegjësinë për t’i mbrojtur qytetarët dhe territorin e tij nga aktet terroriste.
“Komisioni për Punë të Jashtme dhe Diasporë i Parlamentit të Kosovës shpreh ngushëllimet e tij të përzemërta për familjet e viktimave të këtyre sulmeve dhe uron shërim të shpejtë të gjithë të lënduarve”, thuhet në reagim.
