Të paktën pesë persona janë vrarë dhe më shumë se 100 janë plagosur në sulmet me raketa nga Rripi i Gazës në të gjithë Izraelin jugor dhe qendror, raportojnë mediat izraelite.
Grupi militant palestinez Hamas mori përgjegjësinë për sulmin dhe krahu i tij militant tha se hodhi 5000 raketa në 20 minuta.
Forcat e Mbrojtjes së Izraelit (IDF) thanë se grupi “filloi gjuajtjen masive të raketave nga Rripi i Gazës në territorin izraelit” dhe se militantët kishin hyrë në territorin izraelit në “lokacione të ndryshme”.
Ushtria izraelite nisi sot Operacionin Shpata e Hekurt në përgjigje të sulmit të befasishëm të Hamasit ndaj Izraelit.
Dhjetra avionë luftarakë po kryejnë sulme ndaj objektivave të organizatës ekstremiste islamike.
Zëdhënësi ushtarak Daniel Hagari tha se më shumë se 2,200 raketa janë hedhur në drejtim të Izraelit që nga ora 6:30 e mëngjesit dhe se “terroristët” kanë hyrë në Izrael nga toka, deti dhe ajri dhe se përleshjet shpërthyen me ushtarët izraelitë në shtatë vende.
Në një nga ato përleshje, u vra kryetari i Këshillit Rajonal të Hanegev, Ofir Liebenstein, njoftuan autoritetet lokale.
“Ai u vra teksa po shkonte për të mbrojtur vendbanimin gjatë një sulmi terrorist”, thuhet në deklaratë.
Një banor i një kibuci afër Rripit të Gazës tha për TV Channel 12 se banorët ishin bllokuar në shtëpitë e tyre dhe thirrën ushtarët për ndihmë, se kishte të plagosur dhe se shtëpitë po digjen.
Ushtria pritet të mobilizojë dhjetëra mijëra trupa në përgjigje të sulmit të Hamasit.
Ushtria ende nuk i është përgjigjur raporteve se disa ushtarë janë rrëmbyer që kur u publikuan pamjet në Rripin e Gazës, të asaj që duket të jetë trupi i pajetë i një ushtari dhe një tjetri duke u tërhequr zvarrë përgjatë rrugës nga ekstremistët me motoçikletë.
Udhëheqësi i krahut ushtarak të Hamsa-s, Muhamed Deif, kërcënoi se do të “djeg tokën nën këmbët e pushtuesve”, duke pretenduar se më shumë se 5000 raketa janë hedhur në drejtim të Izraelit që nga mëngjesi i sotëm.
Dhuna është intensifikuar në një kohë delikate për qeverinë e ekstremit të djathtë të Izraelit pasi protestat masive kundër një plani të diskutueshëm të reformës gjyqësore janë përhapur në ushtri.
Protestat e paralajmëruara për mbrëmjen e sotme janë anuluar dhe një grup rezervistësh që po protestonin u kanë bërë thirrje të gjithë atyre që duhet të paraqiten në detyrë “pa hezitim”.
Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, tha sot se BE-ja po i ndjek me shqetësim të madh lajmet që vijnë nga Izraeli dhe dënon pa mëdyshje sulmet e Hamasit.
“Kjo dhunë e tmerrshme duhet të ndalet menjëherë.” Terrorizmi dhe dhuna nuk zgjidhin asgjë”, ka shkruar Borelj në rrjetin social X.
