Rusia dhe Liga Arabe do të punojnë për të “ndaluar gjakderdhjen” në Izrael dhe Gaza, tha sot ministri i Jashtëm rus Sergej Lavrov gjatë pritjes në Moskë të sekretarit të përgjithshëm të organizatës që bashkon shtetet arabe.
“Jam i sigurt se Rusia dhe Liga Arabe do të punojnë së pari për të ndaluar gjakderdhjen” me vendet që duan “paqe të përhershme në Lindjen e Mesme”, tha Lavrov.
Lavrov vlerësoi se është e nevojshme jo vetëm t’i jepet fund konflikteve dhe të zgjidhen problemet me civilët, të cilët në numër të madh po bëhen viktima të situatës aktuale, por edhe të përcaktohet arsyeja pse nuk ka zgjidhje për konfliktin izraelito-palestinez.
Sekretari i Përgjithshëm i Ligës Arabe, Ahmed Abul Geit, bëri thirrje për një zgjidhje të drejtë të konfliktit izraelito-palestinez.
Përleshjet vazhdojnë edhe sot, në ditën e tretë që nga fillimi i ofensivës së madhe të papritur nga ana e ekstremistëve palestinezë Hamas në territorin e Izraelit nga Rripi i Gazës.
