Shkruan: Pal ShTUFI
Pavarësisht rrjedhës së ngjarjeve, sot Izraeli është fuqi e madhe ushtarake dhe bërthamore. Burimet zyrtare thonë se ai posedon 90 bomba bërthamore, ndërkaq jo zyrtarisht thuhet se ka më shumë se kaq.
Këto fakte nuk po i përmend për lavdinë e Izraelit, por për të treguar se lufta me këtë shtet nuk ka më kuptim, sikurse që nuk do të kishte kuptim lufta mes Rusisë dhe Amerikës.
Në bazë të gjendjes së sotme, Izraelitët nuk kanë ku të shkojnë më. Ata nuk kanë edhe një vend tjetër në botë, i cili do t’iu falte territor për hir të paqes. Pra, për këtë popull, lufta për territor është luftë për jetë a vdekje.
Në anën tjetër, palestinezët janë të vendosur që mos të bashkëjetojnë me Izraelitët. Përkundrazi, ata janë të përcaktuar për shkatërrimin total të Izraelit. Kjo ideologji është absurde dhe pa shtegdalje politike. Është pat-pozicion i rrezikshëm, i cili sjell vetëm luftëra, vdekje e rrënime apokaliptike.
“PALESTINA E RE” SI KOMPROMIS?
Egjipti ka mbi 1 milion km katrorë tokë. Që i bie rreth 35 herë më i madh se Izraeli e Palestina bashkë. Shkretëtira e Sinait kufizohet me Izraelin. Dhe, një copë krejt e vogël e kësaj shkretëtire (26.000 km2) është më e bukur dhe më pjellore se e tërë shkretëtira e Izraelit dhe Palestinës bashkë.
Në këtë cep të Egjiptit ku ka vetëm disa vendbanime krejt të vogla, do të mund të ndërtohej “Palestina Re”, disa herë më e madhe dhe më e begatë se Palestina e sotme e luftës, gjakut dhe vuajtjeve të pafund. Natyrisht, pjesa historike dhe religjioze e Jerusalemit duhet të ketë eksterritorialitet, ku besimtarët palestinezë mund të shkojnë sa herë që ata kanë nevojë.
PALESTINEZËT NUK PRANOJNË, DIHET
Kurrë nuk besoj që Egjipti nuk do ta pranonte një Palestinë moderne në shkretëtirën e tij, e cila do të ndërtohej me financimin e shteteve më të zhvilluara të botës. Pra një Palestinë e Re e ngjashme me Dubain dhe e garantuar nga Izraeli dhe e mbarë bota.
Paqja mes Izraelit dhe arabëve do t’i sillte shumë përfitime të mëdha Egjiptit, prandaj një cep shkretëtire më pak, asgjë nuk do t’i kushtonte Egjiptit të madh.
E dimë, palestinezët nuk pranojnë. Por, sikur të pajtoheshin 4-5 shtete të rëndësishme arabe dhe superfuqitë si Amerika dhe Europa, palestinezët do ta kuptonin se ky kompromis është zgjidhje më e mirë se rrënimi dhe vdekja e përditshme e Palestinës.
Për fat të keq, ditët dhe javët në vijim do të tregojnë se një kompromis i tillë do të ishte miliona herë më me vlerë se të gjitha krenaritë dhe nacional-fanatizmat në këtë pjesë të trazuar të botës.
* * *
Ndjesë nëse kjo ide lëndon ndjenjat e njerëzve të etur për luftë dhe gjak!
