Ushtruesi i Detyrës së Kryeprokurorit të Shtetit, z. Besim Kelmendi, ka pritur në takim pune Drejtorin e Administratës Tatimore të Kosovës (ATK), z. Ilir Murtezaj, i shoqëruar nga bashkëpunëtorët e tij dhe përfaqësuesit e GIZ-it gjerman, të cilët, po e mbështesin ATK-në në projektin “Mbështetje për zbatim të detyrimeve administrative”.
Temë qendrore e diskutimeve të përbashkëta ishte avancimi i bashkëpunimit dhe ndërveprimit në mes të Prokurorit të Shtetit dhe Administratës Tatimore të Kosovës, standardizimi i procedurave të veprimit lidhur me rastet e paraqitura nga ATK në institucionin e Prokurorit të Shtetit, si dhe adresimi dhe tejkalimi i sfidave të përbashkëta gjatë realizimit të mandatit ligjor dhe kushtetues të institucioneve respektive.
U.D. Kryeprokurori Kelmendi dhe Drejtori Murtezaj vlerësuan bashkëpunimin e deritanishëm ndërmjet Prokurorit të Shtetit dhe Administratës Tatimore të Kosovës, si dhe u dakorduan për thëllimin e këtij bashkëpunimi edhe në të ardhmen. /Kosovatimes/
