Aleanca për Ardhmërinë e Kosovës, përmes një konference për media ka shprehë shqetësimin e saj për siç thotë, bojkotin që shumica parlamentare po i bën opozitës si në Seanca plenare po ashtu edhe në komisione parlamentare.
Deputeti i kësaj partie, Pal Lekaj tha se janë tepër të shqetësuar për këtë bojkot nga shumica parlamentare dhe se bojkotimi i të gjitha kërkesave të opozitës është i paarsyeshëm.
“Qëndrimi i mazhorancës për të bojkotuar të gjitha kërkesat e opozitës është e paarsyeshme. Në praktikat parlamentare nuk ka ndodhur që shumica t’i bojkotojë seancat e komisionet. Po na marrin të vetme të drejtë që e kemi, pyetjet parlamentare”, th ai.
“AAK prej fillimit të kësaj legjislature ka mbështetur miratimin e marrëveshjeve ndërkombëtare në vlerë prej 830 milionë EURO. Shuma e fondeve të bllokuara nga sanksionet ndaj kësaj qeverie janë, 350 milionë euro, afër 100 milionë euro më shumë se vlera e projekteve në marrëveshje ndërkombëtare”, u shpreh ai.
Lekaj tha se Aleanca i ka mbështetur marrëveshjet ndërkombëtare dhe ligjet që janë në dobi të qytetarëve.
“AAK ka votuar një mori ligjesh prej opozite, vetëm se ka besuar që janë të mira për qytetarët e vendit. Është subjekti i vetëm opozitar që ka mbështetur Marrëveshjen e Brukselit dhe të Ohrit. Gjithçka çka akuzon sot VV, është gënjeshtër dhe tendencë me të vetmin qëllim për ta mbuluar dështimin e vet. Si AAK kërkojmë nga shumica që ta mbështet rezolutën tonë për koeficientin e pagës për zyrtarët publikë”, tha Lekaj.
“Prandaj ne jeni të shqetësuar dhe kërkojmë një zgjidhje dhe të dominojë qytetari dhe jo Lëvizja Vetëvendosje. Ne si AAK i kemi përkrahur marrëveshjet ndërkombëtare dhe ligjet që kanë shkuar në të mirë të qytetarëve”, tha ndër të tjerash Lekaj.
Lekaj është zotuar se Aleanca qëndron fort në kërkesat e qytetarëve dhe të organeve të sigurisë.
“Ne qëndrojmë fortë në kërkesat e qytetarëve dhe do të këmbëngulim. E patë me çfarë injorance që thirreshin në heroizëm, ata nuk e votuan rezolutën që kërkon përkrahje për Policinë e Kosovës”, përfundoi Lekaj.
