Numri i personave të helmuar që kanë kërkuar ndihmë mjekësore në Qendrën e Mjekësisë Familjare në Malishevë ka shkuar në 125.
Këtë e ka konfirmuar Afrim Kransiqi, drejtor i QKMF-së të Malishevës.
Nderkohe Agjencia e Ushqimit dhe Veterinarisë ka asgjësuar 64 kilogram mish në lokalin ku u helmuan 125 qytetarë në Malishevë.
Lamir Thaçi, zëdhënës i Agjencisë së Ushqimit dhe Veterinarisë, tha se pas përfundimit të mostrimit produktet të cilat nuk kanë poseduar dokumentacion janë asgjësuar 64 kg mish.
“Lokali nga mbrëmë është mbyllur përkohësisht deri në një vendim tjetër të organeve kompetente”, tha ai.
Sipas tij të gjitha mostrat janë marrë sipas procedurës standarde operative në bashkëpunim me IKSHP. “Të gjitha mostrat janë nisur për laboratorin e IKSHP Prishtinë ku edhe do të testohen në disa parametra. Në bazë të informatave qe do ti marrim në vazhdimësi nga IKSHP, ne do të ndërmarrim veprime të zgjeruara mbi secilin rast që paraqitet. Inspektorët janë në gjendje gatishmërie për të ju përgjigjur secilës situatë. Ministri bashkë me Drejtorin menjëherë kanë urdhëruara qe të nisin inspektimet me frekuencë të shtuar mbi të gjitha lokalet e gastronomisë qe gatuajnë shërbejnë ushqime të shpejta”, tha Thaçi.
Ministri i Shëndetësisë, Arben Vitia përmes një postimi në Facebook, ka reaguar për rastin e helmimit të qytetarëve në Malishevë, duke thënë se inspektoratet dhe organet ligjzbatuese janë në terren dhe kanë marrë të gjitha të dhënat lidhur me rastin dhe burimin e shkakun e helmimit të qindra personave në Malishevë.
Ai tha se mbrëmë pasi u njoftuan për rastin e helmimit bashkë me drejtorin e SHSKUK-së i vizituan të hospitalizuarit në Klinikën Infektive në QKUK.
“Mbrëmë, menjëherë pasi u njoftuam për rastin e helmimit të 68 qytetarëve në Komunën e Malishevës bashkë me drejtorin e SHSKUK-së i vizituam të hospitalizuarit në Klinikën Infektive në QKUK. Në QKUK të hospitalizuar janë 11 qytetarë dhe 9 qytetarë të tjerë janë në Spitalin e përgjithshëm të Prizrenit. Gjendja e të gjithë të hospitalizuarave pas marrjes së trajtimit mjekësor është e qetë dhe stabile. Inspektoratet dhe organet ligjzbatuese janë në terren dhe kanë marrë të gjitha të dhënat lidhur me rastin dhe burimin e shkakun e helmimit”, ka shkruar ai.
