Agjencia e Ushqimit dhe Veterinës e ka konfirmuar lajmin për RTK se rasti i helmimeve në një nga lokalet e gastronomisë, të tipit “fast food”, në Mitrovicë ka ndodhur si pasojë e majonezit.
Këtë e ka konfirmuar Lamir Thaçi nga kjo agjenci për rastin e 6 tetorit në lokalin “Fast Food On Top”, e cila kishte shkaktuar helmim të disa personave, kryesisht nxënës të shkollave fillore, gjimnazit, shkollës ekonomike dhe shkollës së mesme të muzikës.
“Në bazë të hulumtimit epidemiologjik dhe rezultateve mikrobiologjike vlerësohet Epidemi kolektive e shkaktuar nga Salmonella Enteritidis. Salmonella Enteritidis u izolua në mostra të ushqimit (majonez dhe majonez me përshutë) dhe në mostra humane”, ka konfirmuar për RTK Thaçi.
Tutje, ai, ka thënë se me rastin e raportimit, nga lokali janë marrë katër strisho të mjeteve të punës për të vazhduar tutje me ekzaminim mikrobiologjik të ushqimeve.
“Është iniciuar procedurë kundërvajtëse ndaj personit përgjegjës të biznesit individual (pasi ka kryer kundërvajtje nga neni 16, paragrafi 1 nënpagrafi 1.1 që sanksionohen sipas nenit 40 paragrafi 1.3, të Ligjit Nr. 08/120 për Ushqimin). Subjekti afarist vazhdon të jetë i mbyllur deri në eliminimin e të gjitha mangësive të evidentuara në urdhëresat me proces inspektues”, njoftoi tutje Lamir Thaçi.
