Dy persona mbetën të vrarë dhe një u plagos në një sulm terrorist në Bruksel, por autori ende nuk është arrestuar. Për shkak të ngjarjes tragjike në Bruksel është ndërprerë ndeshja kualifikuese për Kampionatin Evropian mes Belgjikës dhe Suedisë.Deri më tani, nuk ka asnjë provë që autori, i cili është ende në arrati, të jetë në ndonjë mënyrë i lidhur me situatën në Izrael dhe Lindjen e Mesme. Siç raportojnë mediat, autori dyshohet se ka zbritur nga motori i tij jo shumë larg sheshit Saincteletta dhe ka qëlluar me automatik dhe më pas është larguar me vrap.Një video është postuar në rrjetet sociale të një burri, ndoshta autori, me një jelek portokalli fluoreshente duke thënë se emri i tij është Abdesalem Al Guilan dhe duke pretenduar se lufton për Allahun. Sipas informacioneve fillestare bëhet fjalë për një 45-vjeçar tunizian, i cili jeton në Bruksel, në komunën Schaerbeek. Një operacion i madh policor filloi në Schaerbeek. Sipas belgut De Standaard, dyshohet se është kontrolluar shtëpia e tij, por autori i sulmit të tmerrshëm nuk është arrestuar.
Sipas mediave belge, i dyshuari ka aplikuar për azil në Belgjikë në nëntor 2019, por është refuzuar në tetor 2020. Komuna e fshiu atë nga regjistri kombëtar dhe Sekretarja belge e Shtetit për Migracionin, Nicole de Moor, pretendon se ai nuk ka qenë kurrë në qendrën e pritjes Fedasil.
Në mars 2021, u hartua një urdhër dëbimi nga Belgjika, por duke qenë se nuk mundën ta gjenin, kërkesa nuk iu dorëzua kurrë. Supozohet se ai mbërriti në Belgjikë në vitin 2016, kur policia përcaktoi se ai donte të kthehej dhe të luftonte për xhihad.
Asgjë konkrete nuk u bë me këtë informacion, sepse kishte “shumë” raporte të tilla në atë kohë, tha Ministri i Drejtësisë Vincent Van Quickenborne .
“Personi njihet për policinë për veprime të dyshimta, kontrabandë me njerëz, qëndrim të paligjshëm dhe si kërcënim për sigurinë e shtetit”, shkruajnë mediat belge.
Burri dyshohet se u dënua në Tunizi për një shkelje të ligjit të zakonshëm dhe jo për terrorizëm, siç u raportua më parë nga media të ndryshme.
