Ministrja e Drejtësisë, Albulena Haxhiu tha se Gjykata Kushtetuese është bërë institucion aleat me opozitën. “Mendoj që Gjykata Kushtetuese është bërë aleat i opozitës. Një përpjekje shumë e vështirë por do të jetë e suksesshme”, ka thënë ajo.
Deputetja e Partisë Demokratike të Kosovës, Ariana Musliu-Shoshi ka thënë se pushteti aktual po tenton ta kthejë vendin nga demokracia në autokraci.
Gjithashtu, ministrja Haxhiu ka kritikuar institucionet për mosefikasitet në trajtimin e rasteve të dhunës në familje.
Ajo në Komisionin hetimor parlamentar në lidhje me rastet e dhunës seksuale dhe dhunës në familje ka thënë se sivjet kanë ndarë buxhet rreth 900 mijë euro për strehimoret. Sipas saj, ky është buxheti më i lartë krahasuar me vitet paraprake.
Haxhiu ka theksuar se mungesa e zhvillimit ekonomik dhe mentaliteti patriarkal, janë faktorët kryesor që po ndikojnë në rritjen e dhunës në familje.
“Ne kemi databazën në kuadër të MD-së ku shohim futjen e të dhënave nga strehimoret, policia, prokuroria e gjykatat. Institucionet që janë kyçe në këtë proces nuk po fusin të dhënat, përkundër faktit që kanë llogari. Hallkat elektronike tashmë ne kemi ndërmarrë, qeveria për herë të parë ka ndarë në buxhet, tashmë janë në fund të procesit”, ka thënë ajo.
Para anëtarëve të këtij komisioni, Haxhiu ka deklaruar se ka shumë punë për të bërë sa i takon rasteve të dhunës në familje. Sipas saj, ende nuk ka raste disiplinore për institucionet që nuk po kryejnë detyrën e tyre si duhet.
“Që nga momenti qe kam pranuar detyrën, çështja e dhunës në familje është bërë prioritet i Qeverisë së Kosovës. Prandaj besoj që pajtoheni që në dy vite e gjysmë i është dhënë vëmendje institucionale dhunës në familje dhe në bazë gjinore. Nuk ka ndonjë vend tjetër që ofron ndihmë juridike falas. Po ashtu kemi hequr procedurat burokratike për viktimat e krimit”, ka thënë Haxhiu.
Ministrja ka bërë të ditur se gjatë fushatës të 16 ditëve të aktivizmit, do të lansojnë projektin për punësimin e grave të dhunuara.
