Ka filluar certifikimi i trajnerëve të pingpongut me licencë ndërkombëtare të trajnerëve ITTF-PTT Level 1, të cilët kanë ndjekur seminarin 5 ditorë të organizuar në bashkëpunim me Komitetin Olimpik të Kosovës përmes projektit të Solidaritetit Olimpik gjatë janarit të vitit 2023.
“Nga data 27 deri më 31 janar, një grup prej 34 trajnerëve të pingpongut nga Kosova mori pjesë në seminarin e specializuar për trajner, në mesin e tyre 3 femra, me qëllim të marrjes së certifikatës ‘ITTF Level 1’. Seminarin e drejtoi ekspertja e njohur Katarzyna Kubas.
Trajnerët që kanë marrë pjesë në seminarin 5 ditore kanë qenë të obliguar që të plotësojnë edhe 30 orë praktike në klubin e tyre, e pastaj të gjithë janë vlerësuar përmes një raporti konfidencial. Certifikimi ‘’ITTF Level 1’’ është një shkallë e rëndësishme në karrierën e trajnerëve të pingpongut, duke u bazuar në standardet e Federatës Ndërkombëtare të Ping Pongut (ITTF).
Kjo certifikatë ofron njohuri thelbësore që i fuqizon trajnerët për të ndihmuar lojtarët e tyre të zhvillohen sipas një plani të organizuar për grup moshën deri 12 vjeçare. Trajnerët e certifikuar kanë të drejtë pjesëmarrje në ITTF Level 2 që pritet të organizohet gjatë vitit 2024.
Suksese të gjithë trajnerëve”, thuhet në komunikatën për media të Federata e Pingpongut e Kosovës. /Kosovatimes/
