Në takimin e parë të grupit punues për hartimin e Koncept-Dokumentit për Rregullimin e Fushës së Vlerësimit të Pronave të Paluajtshme, mori pjesë edhe kryeministri i Kosovës, Albin Kurti, i cili këtë fushë e konsideron tejet të rëndësishme për sektorin financiar.
“Avancimi i kësaj kornize në Republikën e Kosovës, ka rëndësi tejet të madhe, posaçërisht në sektorin financiar. Gjithashtu, edhe ndikim të rëndësishëm në paraqitjen e gjendjes reale të pasqyrave financiare”, tha kryeministri Kurti.
Në fjalën e tij, kryeministri Kurti u shpreh se vlerësimi që mbështetet në parime të përgjithshme, të unifikuara dhe me mekanizma të mbikëqyrjes, ndihmon në përcaktimin e drejtë të vlerës së pronave, parandalon transaksione të dyshimta të shpëlarjes së parasë dhe evazionin fiskal.
“Për efektivitet më të lartë në sektorin privat e publik, rritje ekonomike të vendit dhe mundësi më të mëdha për investimet në patundshmëri nga investitorë të vendit e të huaj”, përfundoi fjalën e tij kryeministri Kurti.
