Presidenti amerikan Joe Biden do të vërë veton ndaj një projektligji të propozuar nga republikanët vetëm për ndihmën urgjente ushtarake për Izraelin, pa marrë parasysh interesat e Ukrainës, nëse ky propozim kalon të dy dhomat e Kongresit. Këtë e ka bërë të ditur Shtëpia e Bardhë .
Zyra e Menaxhimit dhe Buxhetit të Shtëpisë së Bardhë vuri në dukje se ndihma për Izraelin dhe Ukrainën duhet të ndahet si pjesë e një pakete; ndarja mund të “çojë në pasoja globale” për sigurinë kombëtare.
Të hënën, republikanët e Dhomës së Përfaqësuesve paraqitën një propozim për t’i dhënë Izraelit 14.3 miliardë dollarë duke shkurtuar fondet për Shërbimin Federal të të Ardhurave të Brendshme të SHBA.Kryetari i ri i Dhomës së Përfaqësuesve, mbështetësi i Trump, Mike Johnson, i cili votoi kundër ndihmës shtesë për Kievin edhe para se të zgjidhej kryetar, tha se do të dëshironte që fillimisht t’i jepte ndihmë urgjente Izraelit dhe të diskutonte veçmas Ukrainën. Ai tha gjithashtu se do të dëshironte të shihte më shumë përgjegjësi për paratë që tashmë i janë dërguar qeverisë ukrainase për të zmbrapsur agresionin rus.
Demokratët akuzuan republikanët për bllokimin e Kongresit nga ofrimi i ndihmës për Izraelin duke paraqitur një projekt-ligj partizan.
Presidenti Joe Biden i kërkoi më parë Kongresit të ndajë menjëherë 106 miliardë dollarë, nga të cilat më shumë se gjysma do të shkonte në Ukrainë, dhe pjesa tjetër në Izrael, Tajvan dhe për të mbrojtur kufirin e SHBA me Meksikën.
