Përfaqësuesit e Grupit Francez të Agjencisë për Zhvillim (Proparco) si dhe Business Francë kanë shprehur gatishmërinë për të inkurajuar bizneset e tyre anëtare të investojnë në Kosovë, veçanërisht në sektor të energjisë. Kështu ka deklaruar ministrja e Ekonomisë, Artane Rizvanolli e cila po qëndron në Paris për të zhvilluar takime me përfaqësuesit francez.
Ajo bashkë me ambasadorin e Republikës së Kosovës në Francë, Mehdi Halimi, janë takuar me përfaqësuesit e Proparco-s, si dhe odat e biznesit Lëvizja e Bizneseve Franceze (MEDEF) dhe Business France.
Gjatë takimeve Ministrja Rizvanolli e ka prezantuar “Pakon investive të Kosovës për energji 2023 – 25”, ku parashihen mundësitë e investimit dhe projekte konkrete për kompanitë e interesuara, njofton ME.
Në këtë pako, siç thuhet në njoftim, janë paraparë ndërtimi i kapaciteteve prej 950 MW përmes një numri të skemave konkurruese, përfshirë këtu edhe ankandin e parë solar prej 100 MW.
“E lumtur të shoh angazhimin e tyre për të sjellë investime të bizneseve franceze në Kosovë dhe për të thelluar bashkëpunimin në energji dhe ekonomi”, ka vlerësuar ministrja Rizvanolli.
Kurse, kryetari i MEDEF-së, njëherit oda më e madhe e bizneseve në Francë, Fabrice Le Saché ka shprehur kënaqësinë që është takuar me ministren Rizvanolli, gjatë të cilit takim ka vlerësuar punën dhe angazhimin për tërheqje të investimeve dhe ka ftuar kompanitë franceze të marrin pjesë në skemat konkurruese të parapara nga Kosova, duke filluar me ankandin e parë solar fotovoltaik.
“Kosova është një nga vendet më dinamike në Ballkan (3.5% rritje në vitin 2022). Popullsia e re e Kosovës po trajnohet gjithnjë e më shumë (zhvillimi i praktikave, rritja e regjistrimit në kurset e inxhinierisë) dhe sistemi tatimor është konkurrues (taksa e korporatës, kostot e punës, etj.). Qeveria po udhëheq një program dinamik reformash për të përmirësuar klimën e biznesit (lufta kundër korrupsionit)”, ka deklaruar Le Saché, njofton ME.
