Pas bastisjes së shtëpisë së tij, Gjykata Speciale ka arrestuar të enjten ish-kryetarin e Komunës së Malishevës, Isni Kilaj. E Zyra e Prokurorit të Specializuar (ZPS), nuk e përmend arrestimin e tij, por thotë se po kryen operacione në vazhdimësi në Kosovë në një proces hetimor që përqendrohet në vepra penale kundër administrimit të drejtësisë.
“Operacionet e ZPS-së këtë javë janë autorizuar nga ana gjyqësore prej Dhomave të Specializuara të Kosovës (DHSK) dhe janë mbështetur nga Policia e Kosovës dhe Misioni i Bashkimit Evropian për Sundimin e Ligjit në Kosovë (EULEX)”, thuhet në një përgjigje të shkurtër të Dhomave të Specializuara.
Kundër arrestimit të Kilajt, ka reaguar Komuna e Malishevës, e cila në një përgjigje thotë se e ka marrë me shqetësim të madh informacionin se EULEX-i ka arrestuar ish-kryetarin Kilaj. Në reagim thuhet se policia e EULEX-it ka bastisur shtëpinë e Kilajt, e rrjedhimisht ka shkaktuar edhe panik dhe shqetësim të të gjithë qytetarëve.
“Ne si komunë, besojmë dhe jemi thellë të bindur se lufta e Ushtrisë Çlirimtare të Kosovës, ka qenë luftë e pastër dhe mbi të gjitha ka qenë luftë çlirimtare, madje lufta e popullit të Kosovës, është lufta më e pastër që ka ndodhur ndonjëherë në histori të njerëzimit”, ka shkruar Ekrem Kastrati, kryetar i Malishevës.
Kastrati kërkon nga Gjykata Speciale, që të ndërpresë këtë mënyrë të përndjekjes së çlirimtarëve dhe në të njëjtën kohë, kërkon që kjo Gjykatë dhe gjykatat tjera kompetente, të merret me ndjekjen, arrestimin dhe dënimin e autorëve të vrasjes së civilëve të Komunës së Malishevës gjatë viteve 1998-1999 nga ushtria dhe policia e shtetit të Serbisë.
Në Komunën e Malishevës, sipas Kastratit, janë vrarë afër 400 civil të pafajshëm, madje janë vrarë në mënyrën më mizore të mundshme dhe deri më sot, nuk është dënuar askush dhe nuk është zhvilluar asnjë proces gjyqësor për këto vrasje, as për dy masakrat e mëdha, atë të Burimit dhe të Gollubovcit.
“Edhe njëherë, shprehim shqetësimin tonë për këto veprime të pandërprera të Gjykatës Speciale dhe policisë së EULEX-it, për përndjekjen e luftëtarëve të lirisë dhe kërkojmë ndërprerjen e menjëhershme të këtyre arrestimeve të pakuptimta. Isni Kilaj, dhe të gjithë bartësit e luftës çlirimtare, janë të pafajshëm dhe të gjitha këto veprime të gjykatave, i konsiderojmë si veprime politike, që për qëllim kanë njollosjen e luftës për çlirim”, thuhet në reagim.
