Të premten para Prokurorisë Speciale të Kosovës është organizuar një protestë për të “kërkuar drejtësi” për vdekjen e aktivistit të Vetëvendosjes Astrit Deharit.
Protesta është mbajtur dy ditë para se të bëhen shtatë vjet nga vdekja e Deharit.
Aktivistë e qytetarë kanë protestuar duke kërkuar zbardhje të rastit.
Me këtë rast Avni Dehari, babai i Astritit, ka thënë se rasti është dashur të zbardhej 7 vjet më parë, kur sipas tij, prokurorët i kanë pasur të gjitha dokumentet dhe ekspertizat e nevojshme për ta hetuar këtë rast. “Po bëhen 7 vjet që ne si familje, qytetarët e Kosovës dhe shokët e Astritit po kërkojnë drejtësi për vrasjen e Astritit në burgun e Prizrenit. Që ishte një arrestim i inskenuar i politikës së kohës flet vetë fakti se gjithë shokët e Astritit janë shpallur të pa fajshëm, pra ka qenë një inskenim për qëllime politike e jo për veprën që është bërë. Prej 7 vitesh drejtësia është peng në duar të prokurorisë. Një prokurori e mirëfilltë për një rast si të astritit që është vrarë në burgun e Prizrenit, nëse për 7 ditë apo 7 javë, atëherë për 7 muaj është dashur ta zbardh këtë rast”, ka thënë ai.
Ndërkaq, avokati i familjes Dehari, Tomë Gashi, ka thënë se “vrasja e Astrit Deharit ka ndodhur në duart e shtetit në qendrën e paraburgimit në Prizren, por deri më tash institucionet kompetente nuk e kanë zbardhur rastin”. “Prokuroria Speciale e Kosovës ka mbi 5 vjet që e ka marrë këtë rast dhe pasnesër që bëhen 7 vjet nga hetimi i këtij rasti, nuk e ka përfunduar rastin ashtu siç provat tregojnë. Prokuroria e dinë më mirë se të gjithë ne sepse i kanë gjitha provat se Astrit Dehari është vra”, ka thënë Gashi.
Më 5 nëntor bëhen shtatë vjet nga vdekja e aktivistit të Lëvizjes Vetëvendosje, Astrit Dehari, në qelinë e burgut në Prizren. Teksa Prokuroria atëkohë pati thënë se është vetëvrasje, familja në vazhdimësi ka insistuar se bëhet fjalë për vrasje.
Astrit Dehari u gjet i vdekur në qelinë e burgut në Prizren, ku po mbahej i paraburgosur nën dyshimin se kishte kryer sulm ndaj ndërtesës së Kuvendit bashkë me disa aktivistë të tjerë.
Mostrat e Deharit u zhdukën në fillim të dhjetorit të vitit të kaluar. Ministrja e Drejtësisë, Albulena Haxhiu, pati thënë se ky veprim ka për qëllim që të dështojë përfundimisht procesi hetimor për vdekjen e Deharit. U pezulluan nga puna katër zyrtarë të Institutit të Mjekësisë Ligjore (IML), të cilët më pas u kthyen në punë. Por se kush i zhduki mostrat, nuk dihet ende.
