Shefi i Grupit Parlamentar të Partisë Demokratike të Kosovës (PDK), Abelard Tahiri, ka akuzuar kryeministrin e Kosovës, Albin Kurti se ka “refuzuar” ta arrestojë kriminelin, Milan Radojçiq “ndonëse e ka parë në kohë reale” të armatosur në territorin e Kosovës.
Në seancën e së premtes në Kuvendin e Kosovës, Tahiri ka thënë se Kurti ka ndaluar policinë e Kosovës ta arrestojë atë kriminel duke thënë se arsyet i di vetëm ai (Kurti).
“Ky kryeministër që në kohë reale e ka parë Radojçiqin në Republikën e Kosovës të armatosur me grup të armatosur dhe e ka ndaluar policinë e Kosovës ta arrestojë. Nuk ka dashur ta fusë në burgun personin të cilin e ka pas në dorë. E ka parë në kohë reale, ka refuzuar ta arrestojë. Arsyet ne nuk i dimë, i di ky. Koha do ta shpjegojë”, ka thënë Tahiri.
Ndryshe, Millan Radojçiq ka pranuar se e ka organizuar sulmin terrorist ndaj policisë së Kosovës më 24 shtator në Banjskë të Zveçanit dhe ka qenë pjesë e këtij grupi të armatosur.
