Ministri i Mbrojtjes, Ejup Maqedonci, i shoqëruar nga Komandanti i FSK-së, gjenerallejtënant Bashkim Jashari dhe zëvendësministri Shemsi Syla, kanë pritur sot në takim pronarin e kompanisë “Baykar”, Haluk Bayraktar, si dhe ambasadorin e Republikës së Turqisë, Sabri Tunç Angili.
Në njoftimin e kësaj ministrie thuhet se ministri Maqedonci ka theksuar se bashkëpunimi me kompaninë “Baykar” është kthyer në kryefjalën e teknologjisë ushtarake dhe diskutoi për projektet e radhës në të cilat do të investohet, duke u dakorduar me Bayraktar se ky bashkëpunim të zgjerohet përtej blerjeve.
Ndërsa, Gjeneral Jashari në këtë takim u shpreh se përmes prodhimeve të blera nga kompania “Baykar”, FSK tani mund të ushtrojë misionin e saj në nivelin që garanton mbrojtje territoriale dhe siguri.
Për vullnetin e gatishmërinë që kjo kompani dhe Republika e Turqisë ka shfaqur për bashkëpunim me Ministrinë e Mbrojtjes dhe Qeverinë e Republikës së Kosovës, ministri Maqedonci e dekoroi z. Bayraktar me medalje për “Shërbim të Shquar”, thuhet në njoftim.
Ndërsa, ministri i Mbrojtjes, Ejup Maqedonci, ka shkruar në Facebook duke theksuar se kjo kompani dhe Turqia kanë shprehur bashkëpunim me Kosovën, duke theksuar se “lidhja e fuqishme ndërmjet dy shteteve tona do të vazhdojë”.
“Bashkëpunimi me kompaninë Baykar që është kthyer në kryefjalën e teknologjisë ushtarake me prodhimet e veta, ka bërë që FSK për një periudhë të shkurtër të ngrehë kapacitetet e saj luftarake në nivelin që garanton mbrojtje territoriale dhe siguri për të gjithë qytetarët tanë. Gjatë këtij takimi diskutuam për projektet e radhës në të cilat do të investojmë, dhe zgjerimin e këtij bashkëpunimi përtej blerjeve”, ka shkruar Maqedonci.
