Ambasada e Gjermanisë dhe Ambasada e Francës në Kosovë do të organizojnë një ceremoni përkujtimore për armëpushimin i cili i dha fund Luftës së Parë Botërore.
“Sikurse vitet e kaluara, ambasadat e Gjermanisë dhe Francës do të organizojnë së bashku këtë ceremoni. Miqësia franko-gjermane shërben si një dëshmi e fuqishme për mundësinë e pajtimit, madje edhe midis ish-armiqve me një histori të gjatë armiqësie”, thuhet në njoftim.
Ceremonia do të mbahet 11 nëntor në këndin ushtarak të varrezave ortodokse në Prishtinë, teksa të pranishëm do të jenë edhe gazetarët ukrainas që janë strehuar në Kosovë pas luftës Ukrainë – Rusi.
“Çdo vit, Franca dhe Gjermania përkujtojnë së bashku Armëpushimin e 11 nëntorit 1918, i cili i dha fund Luftës së Parë Botërore. Me këtë rast, kjo ceremoni nderon të gjithë ata që kanë rënë për Francën dhe Gjermaninë në konfliktet e kaluara dhe aktuale dhe shërben si një rikujtim i vazhdueshëm për vuajtjet e të gjithë njerëzve të prekur nga mizoritë e luftës”, njofton komunikata.
