Me tone të larta të zërit është shqyrtuar në parim projektligjit mbi ndarjet buxhetore për vitin e ardhshëm në Komisionin Parlamentar për Buxhet.Deputetë të partive opozitare kanë ngritur kritika ndaj ministrit të Financave, Hekuran Murati për ndarjet buxhetore.
Deputeti i PDK-së, Ferat Shala derisa kritikoi ministrin Murati për ndarjen e një miliard eurove për subvencione, ngriti dyshime se ku mund të destinohen të njëjtat, raporton RTKlive.
“Në buxhet ke 26 për qind investime kapitale ndërsa 32 për qind subvencione. Unë se kuptoj qysh ka mundësi një shtet të ndajë një miliard euro subvencione në një situatë paqeje, ato dihet ku shkojnë. Që në start një miliard euro janë në dorën tuaj dhe nivelit politik për të bërë çfarë të doni. Ndërsa janë më pak se 200 milionë euro investime kapitale që do të përmirësonin mirëqenien e qytetarëve. Çfarë doni me bo me një miliard euro vitin e ardhëm, doni me i ble zgjedhjet. Është marre”, tha ai.
Ndërkaq deputeti Shala u përplas verbalisht me ministrin Murati, në lidhje me investimet në komunën e Mitrovicës.
Deputeti Shala kritikoi ministrin që nuk janë ndarë mjete mjaftueshëm për këtë qytet, derisa ministri Murati i quajti dezinformata deklarimet e deputetit.
Kritika pati edhe deputeti i LDK-së, Avdullah Hoti. “Në një situatë normale ne si deputet të opozitës do të duhej të prezantonim projekte shtesë për të bërë një shpërndarje më të barabartë. Por ky nuk është rasti. Ka probleme fondamentale në strukturë të buxhetit. Me këtë buxhet nuk mund të ndërtohen as për së afërmi çerdhet e premtuara. Për banim social, nuk figuron kjo fare. Sigurimet shëndetësore, nuk shihen as tek pjesa përshkruese. Për Fondin Sovran i keni paraparë 30 milionë euro”, tha ai.
S`ka kourum për ratifikimin e marrëveshjes në Komisionin për Buxhet
Në Komisionin Parlamentar për Buxhet po shqyrtohet projektligjit nr.08/L-259 për Ratifikimin e Marrëveshjes së Financimit ndërmjet Republikës së Kosovës, e përfaqësuar nga Ministria e Financave, Punës dhe Transfereve dhe Asociacionit Ndërkombëtar për Zhvillim për “Projektin për forcimin e qeverisjes digjitale për ofrimin e shërbimeve”.
Me këtë rast, ministri i Financave, Hekuran Murati tha se projekti kap vlerën e 18.5 milionë eurove dhe ka të bëjë me investime në strukturën digjitale.
“Ky projekt ka vlerën e 18.5 milionë eurove dhe parasheh një sërë masash dhe investimesh në infrastrukturën digjitale. Është e nevojshme të ofrohen shërbime në formë digjitale. Marrëveshja është kredi e butë”, shtoi ministri Murati.
Lulëzon Jugaxhiu nga zyra e kryeministrit tha se përmes këtij projekti do të rritet cilësia e shërbimeve elektronike.
“Projekti paraqet një reformë të thellë që qëllim e ka rritjen e cilësisë dhe sasisë të shërbimeve elektronike për qytetarët. Pjesa më e madhe e mjeteve do të jenë për pajisje. 80 për qind e vlerës së projektit ka të bëjë me investime direkte në sisteme. Natyrisht ideja ka qenë që të bëhet kombinim, jo vetëm në teknologji por edhe në aspektin e përgatitjeve”, shtoi ai.
Anëtari i Komisionit Parlamentar për Buxhet, nga radhët e LDK-së, Avdullah Hoti kërkoi të di nëse këto miliona euro do të shpenzohen në kontraktimin e kompanive vendore apo ekspertëve nga jashtë.
“Unë dua të dijë këto 18 milionë euro nga kjo marrëveshje ku do të shkojnë. A do të blini pajisje të reja apo do t’i trajnoni njerëzit. A do të kontraktoni ndonjë kompani vendore të ofrojë shërbime. Ky vend nuk është shkatërruar qysh po pretendohet vazhdimisht”, theksoi ai.
Për shkak të mungesës së kuorumit, projektligji nuk u hodh në votim.
