Gjatë diskutimeve për miratimin e paketës së zgjerimit për këtë vit dhe raporteve të progresit, brenda Komisionit Evropian (KE) është shfaqur mospajtim i thellë rreth idesë që KE-ja të rekomandojë nisjen e negociatave të anëtarësimit me Bosnjë e Hercegovinën.Në takimet e shefave të kabineteve të komisionarëve të hënën dhe të martën nuk është arritur pajtim, prandaj kjo çështje është lënë për t’u vendosur personalisht nga komisionarët në takimin e kolegjit, të mërkurën.
Komisionarët nga Kroacia, Sllovenia, Austria, Italia dhe disa vende tjera kanë insistuar se Komisioni duhet të rekomandojë nisjen e negociatave të anëtarësimit me Bosnjë e Hercegovinën, sepse me këtë hap do të ndihmohej procesi i reformave dhe stabiliteti i këtij vendi. Posaçërisht ky insistim është i lidhur me faktin se Komisioni propozon nisjen e negociatave për Ukrainën dhe Moldavinë, të cilat në procesin e zgjerimit kanë hyrë 20 vjet pas Bosnjë e Hercegovinës.
Kohëzgjatja e procesit nga aplikimi në BE deri te statusi “kandidat”
Shqipërisë iu deshën pesë vjet për marrjen e statusit si kandidate, nga dita kur aplikoi për anëtarësim në Bashkimin Evropian. Ndërsa, Ukrainës e Moldavisë iu deshën vetëm katër muaj.
| Aplikimi | Statusi “kandidat” | |
|---|---|---|
| Shqipëria | 28 prill 2009 | 24 qershor 2014 |
| Bosnja dhe Hercegovina | 15 shkurt 2016 | 13 dhjetor 2022 |
| Gjeorgjia | 03 mars 2022 | – |
| Kosova | 15 dhjetor 2022 | – |
| Moldavia | 03 mars 2022 | 23 qershor 2022 |
| Mali i Zi | 15 dhjetor 2008 | 17 dhjetor 2010 |
| Maqedonia e Veriut | 22 mars 2004 | 17 dhjetor 2005 |
| Serbia | 22 dhjetor 2009 | 01 mars 2012 |
| Turqia | 14 prill 1987 | 11 dhjetor 1999 |
| Ukraina | 28 shkurt 2022 | 17 qershor 2022 |
