Kolegji i Gjykatës Supreme të Kosovës e ka refuzuar si të pabazuara kërkesën për mbrojtje të ligjshmërisë, të avokatit mbrojtës dhe të dënuarit për krime lufte Zoran Vukotiq, të paraqitura kundër aktgjykimit të Gjykatës Themelore në Prishtinë dhe aktgjykimit të Gjykatës së Apelit të Kosovës.
Me këtët rast Supremja vërteton dënimet e dy shkallëve të mëparshme, se i akuzuari Vukotiq, ka bërë krime gjatë luftës në Kosovë.
“Në çështjen penale kundër të dënuarit Z.V., për shkak të veprës penale krime të luftës kundër popullsisë civile nga neni 142 lidhur me nenin 22 të Ligjit Penal të Republikës Socialiste Federative të Jugosllavisë (LPRSFJ), të kryer në bashkëkryerje me pjesëtarët tjerë të panjohur të njësitit të përmendur rezervist të policisë serbe dhe persona tjerë të armatosur dhe të uniformuar, duke vendosur sipas kërkesave për mbrojtjen e ligjshmërisë të mbrojtësit të dënuarit dhe të dënuarit, të paraqitura kundër aktgjykimit të Gjykatës Themelore në Prishtinë-Departamenti Special PS.nr.28/2022 dhe kundër aktgjykimit të Gjykatës së Apelit të Kosovës – Departamenti Special APS.nr.50/2022, në seancën e kolegjit të Gjykatës Supreme, të mbajtur me datë 27 shtator 2023, këto kërkesa janë refuzuar si të pabazuara”, thuhet në vendimin e Supremes.
Kujtojmë se Zoran Vukotiq është dënuar për dhunë seksuale gjatë luftës në Kosovë me 10 vjet burg.
Ai akuzohet se si pjesëtar i forcave policore të njësisë rezervë të Ministrisë së Punëve të Brendshme të Serbisë, në muajin maj 1999 në territorin e Vushtrrisë, në bashkëkryerje me pjesëtarët e tjerë të këtij njësiti, kishte marrë pjesë në dëbimin e popullatës civile shqiptare si dhe në dhunimin seksual ndaj një gruaje të nacionalitetit shqiptar.
