Komandanti i Forcës së Sigurisë së Kosovës (FSK), gjenerallejtënant Bashkim Jashari së bashku me delegacionin përcjellës nga FSK, u pritën në takim pune në Ministrinë e Mbrojtjes në Berlin nga shefi i Mbrojtjes të Republikës Federale të Gjermanisë, gjeneral Carsten Breuer, me të cilin u dakorduan për thellimin e bashkëpunimit ndërmjet dy ushtrive.
“Dy homologët diskutuan rreth situatës së përgjithshme të sigurisë në Kosovë, rajon dhe me gjerë, ndërsa theksuan rëndësinë e rritjes së bashkëpunimit ushtarak ndërmjet ushtrive të dy vendeve”, thuhet në njoftimin lëshuar nga Zyra për media e FSK-së.
Gjeneral Jashari e ka falënderuar homologun gjerman për mbështetjen e vazhdueshme që shteti gjerman dhe në veçanti Bundeswehri ka dhënë dhe po jep në zhvillimin e aftësive dhe kapaciteteve të FSK-së.
Komandanti i FSK gjithashtu i ofroi homologut të tij bashkëpunim mes dy ushtrive përfshirë bashkë-zbarkimet në misione të ndryshme, në operacione ndërkombëtare si dhe në fusha të tjera të interesit të përbashkët.
“Gjenerali Breuer shprehu vlerësim të lartë për gjeneral Jasharin në funksion të ngritjes dhe profesionalizimit të kapaciteteve të FSK-së, si dhe për angazhimin që po e bëjnë në funksion të paqes në Ballkan, si dhe rritjes së bashkëpunimit mes dy ushtrive”, thuhet në njoftimin e FSK-së.
Të dy shefat e mbrojtjes, ndërkaq janë pajtuar për thellimin e bashkëpunimit në mes të dy vendeve dhe me këtë rast gjeneral Jashari e ka ftuar gjeneralin Breuer, për vizitë zyrtare në Kosovë.
