Presidenti Bajram Begaj inkurajoi komunitetin e gazetarëve në kryerjen e këtij misioni, duke iu garantuar mbështetjen e tij. “Kjo kauzë kërkon njerëz profesionistë dhe idealistë, që besojnë te idealet e lirisë së shprehjes dhe përgjegjësisë publike. Ndaj ju inkurajoj të mos dorëzoheni para vështirësive, sepse përkushtimi dhe guximi juaj për të përcjellë te publiku informacion të saktë dhe objektiv është kontribut për mirëqenien e shoqërisë”. Këtë deklaratë ai e bëri gjatë ndarjes së çmimeve vjetore për gazetarët nga ana e Unioni i Gazetarëve Shqiptarë (UGSh).
Kjo veprimtari është mbajtur në mjediset e Hotel “Tirana International”, në të cilën morën pjesë gazetarë nga Shqipëria, Kosova, Maqedonia e Veriut dhe Lugina e Preshevës.Ky aktivitet i përkrahur nga “JTI” që shënoi edicionin e 15 të ndarjes së çmimeve të konkursit “Vangjush Gambeta” për gazetarinë ekonomike.
Drejtori i “JTI” për Kosovë, Shqipëri dhe Maqedoni të Veriut, Sazan Alija, vlerësoi lart punën dhe angazhimin e gazetarisë ekonomike dhe theksoi ”se puna juaj është thelbësore në rritjen e transparencës së institucioneve shtetërore si dhe në krijimin e një konkurrence të ndershme për bizneset, në veçanti lidhur me “fiskalizimin” ose përpjekjet që bën shteti kundër evazionit fiskal në ekonomi”.
Alija theksoi se përveç përkrahjes së çmimeve “Vangjush Gambeta”, JTI ka mbështetur veçanërisht gazetarinë ekonomike duke përkrahur dhe mundësuar pjesëmarrjen e tyre në Kongresin e Gazetarisë në Vjenë, samiti i ministrave të financave, guvernatorëve të bankave qendrore dhe administratave tatimore në Malin e Zi dhe ngjarjet tjera, me një qëllim qartë – të rriten praktikat rajonale për mirë qeverisje, sundim të ligjit dhe ekonomi tregu të lirë.
Me këtë rast kryetari i UGSh Aleksander Çipa i ndau mirënjohje “JTI” partnerit tradicional i cili për 15 vite ka mundësuar konkursin për çmimet “Vangjush Gambeta”. “Përmes bashkëpunimit dhe partneritetit të “JTI” me UGSh është bërë i mundur inkurajimi për raportim cilësor dhe të thelluar në hapësirën mediatike shqiptare për çështje të ekonomisë”, thuhet në mirënjohjen e UGSh për “JTI””.
Kryetari i UGSh, Aleksander Çipa, theksoi se duke i falënderuar “JTI” për të 15 herë janë duke u ndarë çmimet “Vangjush Gambeta” dhe se gjatë viteve në konkursin për çmime marrin pjesë edhe gazetarët nga Shqipëria, Kosova dhe Maqedonia e Veriu.
Drejtuesi i Pranisë së OSBE-së në Shqipëri, ambasadori Bruce Berton, theksoi se gazetarët shqiptarë punojnë nën kërcënime dhe klimë të tensionuar përballë sfidash të shumta.
Krahas kërcënimit të gazetarëve, u tha në tubim, liria e medias vuan nga kufizime, që vijnë prej lidhjeve të politikës me biznesin, nga transparenca e pakët, përqendrimi i pronësisë së tyre.
Çmimet e konkursit “Vangjush Gambeta “2023 i kanë fituar: Entela Bajramaj- Televizion-Shqipëri, Julian Hoxhaj, shtypin e shkruar/online, Zenel Miftari, Maqedoni e Veriut dhe Sanije Jusufi nga Grupi Koha.
Çmimi “Reporter i Vitit” i është ndarë për gazetarin Osman Stafa, çmimi “Raportimi më i mirë i Vitit” për gazetarin Thimi Samarxhiu dhe çmimi “Ismet Bellova” për gazetarinë sportive post mortum iu nda gazetarit të Radio Kosovës Milaim Krasniqi.
Unioni i Gazetarëve Shqiptarë ka ndarë dy çmimet e rëndësishme “Karriera” të cilat i kanë fituar: Elez Biberaj, drejtues i VOA dhe ish drejtues i programit shqip të Zërit të Amerikës dhe Augustin Palokaj, korrespondent i Grupit Koha nga Brukseli.
Mesazh mjaft emocional drejtuar GSh percolli Dr. Elez Biberaj me rastin e vlerësimit të tij me çmimin “Karriera”. Ai përmes një letre falënderoi përzemërsisht dhe me mirënjohje të thellë Unionin e Gazetarëve Shqiptare për akordimin e çmimit “Karriera” Nderimi nga një shoqatë që përfaqëson gazetarë nga të gjitha trevat shqiptare është një privilegj i jashtëzakonshëm për mua. Falënderime të posaçme edhe kolegut Armand Mero, i cili më përfaqësoi në ceremoninë ë u zhvillua në Tiranë, me 10 nëntor. Urime te gjithë kolegeve fitues te çmimeve vjetore te akorduara nga Unioni i Gazetareve Shqiptare’, ka thënë Biberaj.
Ndërsa Palokaj me rastin e marrjes së çmimit të karrierës theksoi përgjegjshmërinë e vet gazetarëve në detyrë.
“Edhe ne gazetarët, kur kërkojmë lirinë e shprehjes, duhet të ndjejmë përgjegjësinë tonë kur raportojmë. Është një thënie se kur gabojnë mjekët, gabimin e tyre e mbulon disi dheu, por kur gabon gazetari ajo mbetet dhe mund të ketë pasoja. Gabimi i qëllimshëm i gazetarit, lajmi I rrejshëm, mund të jetë edhe një lloj helmi”, tha zoti Palokaj.
Ndërsa drejtuesi i Unionit të Gazetarëve Shqiptarë, Aleksandër Çipa, pohoi se organizata përpiqet të mbështesë meritokracinë dhe gazetarinë profesionale, edhe pse tregu i mediave është në çrregullim dhe anarki.
“Ne përpiqemi të adresojmë ndihmesën e kolegëve, e cila bazohet më së pari në sakrificën për të realizuar një raportim kurajoz dhe të thelluar, në ambicien për një kualifikim dhe përmirësim të cilësisë së punës në gazetari dhe mbi të gjitha për të respektuar shtyllat e fuqishme morale dhe të besueshmërisë publike”, tha zoti Çipa.
Ceremonia u moderua nga gazetarja Alketa Gashi Fazlliu e RTK, Prishtinë dhe Sebastian Zonja i MCN, Tiranë. /Kosovtimes/
