Komuna e Prishtinës ka reaguar në lidhje me kritika që pati për gjendjen e stadiumit “Fadil Vokrri” gjatë ndeshjes eliminatore për “Euro 2024” mes Kosovës e Izraelit të zhvilluar të dielën.
Kosova fitoi ndeshjen me rezultatin 1:0, ndërsa gjendja e fushës ishte e rëndë. Madje pati kritika edhe nga lojtarët e Izraelit, një prej tyre e quajti “stallë të derrave”.
Deputetja e partisë në pushtet Lëvizjes Vetëvendosje, Fitore Pacolli, në një postim në rrjete sociale kishte kritikuar komunën, duke thënë se është përgjegjëse për investime dhe mirëmbajtjen e fushës në stadiumin e Prishtinës.
“Komuna e Prishtinës është përgjegjëse për investime dhe mirëmbajtjen e fushës në stadiumin e Prishtinës. Kush po t’i bllokon investimet dhe mirëmbajtjen e fushës o Perparim Rama? ‘Pak llap, pak gollak’, pak rrenc e pak manipulant”, ka shkruar Pacolli.
E në një reagim të Komunës së Prishtinës, është thënë se përgjegjësia i takon Federatës së Futbollit të Kosovës.
“Ju informojmë se mirëmbajtja e stadiumit të futbollit “Fadil Vokrri” nuk është përgjegjësi e Kryeqytetit Prishtina, por është obligim i Federatës së Futbollit të Kosovës. Kjo përgjegjësi është e rregulluar me nenin 3, paragrafi 1.3. të Memorandumit të Bashkëpunimit të lidhur ndërmjet Kryeqytetit dhe Federatës së Futbollit të Kosovës me datën 30 dhjetor 2022. Ne jemi të vetëdijshëm se stadiumi “Fadil Vokrri” është i mbingarkuar me lojëra ndërkombëtare të klubeve dhe të Kombëtares së Kosovës dhe rrjedhimisht është në gjendje jo të mirë, prandaj Kryeqyteti bashkë me Federatën e Futbollit të Kosovës është duke punuar tash e sa kohë në projektin për ndërtimin e stadiumit të ri të Kryeqytetit”, thuhet në reagim të Komunës së Prishtinës. /Kosovatimes/
