Emisari i posaçëm i Bashkimit Evropian për dialogun Kosovë-Serbi, Mirosllav Lajçak, pas qëndrimit në Beograd ka theksuar të domosdoshme vazhdimin e dialogut dhe zbatimin e Marrëveshjes për normalizimin e raporteve ndërmjet dy vendeve. Lajçak në Serbi ka takuar presidentin Aleksandër Vuçiq dhe udhëheqësin serb të negociatave, Petar Petkoviq.
“Pas vizitës sime në Kosovë, kam udhëtuar edhe në Beograd për t’u përgatitur për takimin e kryenegociatorëve të kësaj jave. Me presidentin Vuçiq dhe kryenegociatorin Petkoviq diskutova rrugën përpara në dialog dhe hapat e nevojshëm të ardhshëm për zbatimin e Marrëveshjes për Rrugën drejt Normalizimit”, ka shkruar në platformën X, Lajçak.
Në një njoftim për media të lëshuar nga Presidenca serbe thuhet se Vuçiq ka ripërsëritur se Serbia dëshiron shtensionim, paqe dhe stabilitet.
Ndërsa pas takimit, Petar Petkoviq tha se Beogradi zyrtar do të marrë pjesë në takim në kuadër të vazhdimit të dialogut në Bruksel.
“Beogradi nuk i është shmangur asnjëherë dialogut, për këtë arsye e pranuam ftesën e zotit Lajçak që pas dy ditësh të takohemi në Bruksel, ku do të vazhdojnë bisedimet ndërmjet Beogradit dhe Prishtinës. Pala jonë po shkon me një ekip ekspertësh ku do të diskutojmë tekstin e statutit të Asociacionit që është hapi i parë konkret drejt formimit të saj”, tha Petkoviq.
Sa i përket palës serbe, diskutimet për statutin duhet të japin përgjigje se si të zgjidhen një sërë çështjesh të rëndësishme, si rregullimi i shëndetësisë, arsimit dhe planifikimit hapësinor. Sipas Petkoviqit, Beogradi ka të drejtë të financojë të gjitha këto institucione.
Kujtojmë se më 16 nëntor, kryenegociatori i Kosovës, Besnik Bislimi dhe ai i Serbisë, Petar Petkoviq, do të takohen në Bruksel. Ky takim vjen pas vizitës që Lajçak i bëri Prishtinës më 7 nëntor, ku diskutoi me përfaqësuesit e qeverisë dhe të opozitës për draftstatutin e ri për Asociacionin e komunave me shumicë serbe.
