Kryetari i Partisë Demokratike të Kosovës, Memli Krasniqi, ka nisur vizitën zyrtare në Bruksel, ku po merr pjesë në tryezën për Ballkanin Perëndimor, organizuar nga grupi politik liberal i Parlamentit Evropian, Renew Europe.
Krasniqi, në një postim në Facebook, njofton se në margjinat e takimeve, ka ritheksuar qëndrimin se BE duhet t’i heqë sa më parë masat e padrejta ndaj Kosovës, derisa ka thënë gjithashtu se paqja, siguria dhe stabiliteti rajonal janë interes i përbashkët i Kosovës dhe BE-së.
“Vizitën zyrtare në Bruksel e nisa me pjesëmarrjen në tryezën për Ballkanin Perendimor, organizuar nga grupi politik liberal i Parlamentit Evropian, Renew Europe. Pata kënaqësinë që, në margjinat e takimit, të diskutoj dhe të shkëmbej qëndrime të vlefshme me Ilhan Kyuchyuk, Bashkë-presidentin e ALDE-së, Stéphane Séjourné, president i Renew Europe dhe Janez Lenarçiç, komisionerin Evropian për Menaxhimin e Krizave. Paqja, siguria dhe stabiliteti rajonal janë interes i përbashkët i Kosovës dhe BE-së. Në këtë proces, është tejet e rëndësishme që Kosova dhe Serbia të arrijnë një marrëveshje përfundimtare, me njohjen e ndërsjellë në qendër”, shkruan Krasniqi.
Ai njofton se me këtë rast, ka ritheksuar qëndrimin se BE-ja duhet të heqë sa më parë masat e padrejta ndaj Kosovës. “PDK është mirënjohëse ndaj aleatëve ndërkombëtarë për mbështetjen e vazhdueshme ndaj shtetit tonë”, ka shtuar Krasniqi.
