Senati, pas Dhomës së Përfaqësuesve të Kongresit Amerikan, miratoi një projektligj për financimin e përkohshëm të punës së qeverisë federale. Dokumenti, i cili u mbështet nga 87 senatorë dhe 11 ishin kundër, nuk përfshin shpenzimet për ndihmë shtesë për Izraelin dhe Ukrainën. Këtë e raporton CNN .
Projektligji tani do t’i dërgohet për nënshkrim presidentit amerikan Joe Biden. Nënshkrimi i dokumentit nga presidenti do të shmangë të ashtuquajturën mbyllje – ndalimin e punës së qeverisë federale. Një zëdhënës i Shtëpisë së Bardhë tha të martën se presidenti është i gatshëm të nënshkruajë projektligjin nëse ai kalon në Senat dhe “ruan nivelet aktuale të financimit dhe është i lirë nga faktorë të dëmshëm politikë”.
Projektligji i ri, i propozuar nga Kryetari i Dhomës së Përfaqësuesve, Mike Johnson, zgjat financimin deri më 19 janar 2024 për programet dhe departamentet qeveritare që janë përgjegjëse për ndërtimin ushtarak, çështjet e veteranëve, transportin, energjinë dhe strehimin. Financimi për zërat e mbetur të buxhetit zgjatet deri më 2 shkurt 2024.Çështjet e financimit të ndihmës për Ukrainën, Izraelin, Tajvanin dhe forcimin e kufirit jugor të Shteteve të Bashkuara konsiderohen veçmas. Shtëpia e Bardhë propozoi të ndahen 106 miliardë dollarë për këto qëllime. Administrata e Joe Biden donte që financimi për të gjitha qëllimet të adresoheshin në një paketë, por republikanët e kundërshtuan këtë. Dhoma e Përfaqësuesve e kontrolluar nga republikanët miratoi një projekt-ligj të veçantë ndihme prej 14 miliardë dollarësh për Izraelin që nuk përfshin ndihmën për Ukrainën. Senati, i cili kontrollohet nga demokratët, bllokoi nismën.
