Presidenti ukrainas Volodymyr Zelensky ka paralajmëruar se Rusia nuk i ka ndryshuar planet e saj afatgjata dhe se së shpejti, do të tentojë të nxisë një luftë të re në Ballkan.
Presidenti ukrainas, Volodymyr Zelensky, ka thënë se Ukraina ka informata të sigurta se Rusia është duke tentuar të nxisë një luftë të re në Ballkan.
“Mbajeni vëmendjen në Ballkan”, tha Zelensky gjatë një prezantimi para gazetarëve afrikanë. ” Më besoni, kemi informata. Rusia ka një plan afatgjatë. Së pari ishte Lindja e Mesme dhe Ballkani do të jetë shpërqendrimi i dytë. Nëse partnerët tanë nuk bëjnë asgjë tani, atje përsëri do të ndodhë një shpërthim, dhe përsëri ky nuk do të jetë një tregim i ri. Marrëdhëniet e vendeve ballkanike janë në krizë që një kohë të gjatë prandaj Rusia do të investojë në shtytjen e njërit shtet ballkanik që të nisë luftë me tjetrin”, deklaroi, mes tjerash, presidenti ukrainas.
Presidenti rus Vladimir Putin tha në tetor të këtij viti në samitin “Belt and Road” në Kinë se kishte një bisedë kalimtare me presidentin serb Aleksandar Vuçiq.
“Ai është i shqetësuar për situatën në rajonin e tij dhe rreth Serbisë.” Ne ndajmë shqetësimin e tij”, tha Putin.
Edhe presidenti i Serbisë, Aleksandar Vuçiq, ka thënë se ka biseduar me Putinin, por nuk ka pasur takim bilateral.
Vuçiq tha se vuri re se Putini po “shpërthente nga besimi”, duke shtuar se ai pati një takim të rëndësishëm dhe të gjatë me presidentin kinez Xi Jinping dhe kryeministrin hungarez Viktor Orban.
Nuk është hera e parë që presidenti rus flet për situatën në Ballkanin Perëndimor, Serbinë dhe popullin serb në muajt e fundit.
“Kam dëgjuar shumë herë se duhet bere presion ndaj serbëve”. E tillë është filozofia. Pse saktësisht duhet të rrëzohen serbët? Të them të drejtën, nuk e di. Madje, në biseda të hapura me liderë të caktuar kur ishim ende në marrëdhënie normale, më thanë se presioni duhet të rritet. E pyeta pse dhe nuk mora përgjigje. Pikërisht kështu është krijuar një filozofi e tillë, një paradigmë, duhet të vendosim kështu – të shtojmë presionin”, tha Putin në Forumin Valdai, duke folur për politikën e Perëndimit ndaj Serbisë.
Ai shtoi se përkundër përpjekjeve, “nuk është e mundur të thyhen serbët”.
