Presidenti i Bjellorusisë, Aleksandër Lukashenko, i bëri thirrje sot Serbisë të vendosë nëse dëshiron të bashkëpunojë me Bjellorusinë, raporton RIA Novosti.
Lukashenko emëroi sot ambasadorë të rinj në Kinë, Zimbabve, Afrikën e Jugut, Serbi dhe Indonezi, si dhe konsullin e përgjithshëm në Mumbai dhe zhvilloi një takim me ta.
Ambasador i Bjellorusisë në Republikën e Serbisë dhe në të njëjtën kohë në Republikën e Maqedonisë së Veriut është emëruar Sergej Malinovskij, i cili më parë ka qenë shef i Departamentit kryesor për informim dhe çështje analitike në Ministrinë e Punëve të Jashtme.
Lukashenko: Është e nevojshme të kuptohet politika që po udhëheq Serbia
“Duhet të kuptohet politika që Serbia udhëheq dhe dëshiron të udhëheqë në raport me Bjellorusinë. Nëse ata duan, atëherë duhet të ketë rezultate në marrëdhëniet tregtare dhe ekonomike. Nëse duan të tundin bishtin, thënë përafërsisht, dhe të mbështesin sanksionet evropiane dhe amerikane kundër Bjellorusisë, kjo është puna e tyre, le të përcaktojnë dhe mbështesin nëse kanë harruar të mirat me të cilat shkuam tek ata”, tha Lukashenko, transmeton RIA Novosti.
Regjistrimi i takimit të tij me ambasadorët e rinj të Bjellorusisë është postuar në kanalin Telegram Prvi, i cili ndodhet pranë zyrës së shtypit të presidentit.
“Ne bashkëpunojmë me shumë vende. Ne duhet të forcojmë marrëdhëniet, kjo do të vlejë edhe për Serbinë, vetëm duhet të kuptojnë politikisht se çfarë duan”, tha Lukashenko.
TASS shkruan se Lukashenko, në një takim me diplomatë të huaj, vuri në dukje nevojën e forcimit të bashkëpunimit me ato vende që përpiqen për bashkëpunim konstruktiv.
Ai e porositi ambasadorin e ri të republikës në Serbi, Sergej Malinovski, që të merret me politikën që Beogradi drejton ndaj Minskut.
“Nëse duan të bashkëpunojnë, atëherë duhet të ketë rezultate në aspektin tregtar dhe ekonomik. Nëse duan vetëm të tundin bishtin, përafërsisht, dhe të mbështesin sanksionet europiano-amerikane kundër Bjellorusisë, le t’i identifikojnë dhe mbështesin”, shkruan TASS.
Nëse Perëndimi dhe Amerika nuk duan të bashkëpunojnë me ne, shtoi ai, kjo është mirë, ne do t’i “ruajmë” ambasadat tona aty ku është e nevojshme.
“Dhe ne duhet të zhvendosim diplomatët e lartë në ato vende ku shohim lëvizje,” tha ai.
Portali rus Krasnaya Vesna shkruan se presidenti i Bjellorusisë ka theksuar se është e nevojshme zhvillimi i marrëdhënieve diplomatike me ato vende ku ka një trend pozitiv.
