Në Dhomat e Specializuara të Kosovës në Hagë po dëshmon dëshmitari i pestë i mbrojtjes, Zijadin Hoxha, në çështjen gjyqësore ndaj Pjetër Shalës.
Pyetjet për këtë dëshmitar i ka filluar mbrojtja e Pjetër Shalës përmes avokatit, Jean-Louis Gilissen. Dëshmitari Hoxha tha se ka qenë i burgosur politik.
“Kam qenë në vitin 81 i burgosur politik. I kam mbajt 9 vjet burg në burgjet e Jugosllavisë. Me kanë akuzu si kundërrevolucionist”, tha Hoxha.
Dëshmitari Hoxha tha se deri në prag të luftës ka jetuar në Gjermani pasi që në vitin 1993 ishte larguar nga vendi me arsyen se kishte tendenca që të arrestohet serish.
“Në vitin 1993 jam largu. Kanë deshtë me më arrestu për të dytën herë UDB-ja jugosllave dhe kam ikë nga vendi im kam dal në Gjermani dhe e kam fitu azilin politik në Gjermani dhe në Gjermani kam jetu”, tha Hoxha.
Dëshmitari Hoxha tha se me 22 ose 23 prill të vitit 1999 ka ardhur në Shqipëri për t’u mobilizuar në UÇK. Ai tha se nga Gjermania ka ardhur me një shok të tij të quajtur, Ekrem Ahmeti.
Dëshmitari Zijadin Hoxha ka thënë se në kohën e luftës nuk i ka njohur, tani deputeten e Aleancës për Ardhmërinë e Kosovës (AAK), Time Kadrijajn dhe ish-deputeten e Partisë Demokratike të Kosovës (PDK), Safete Hadergjonaj.
“Jo nuk e njoh. Tani e njoh por në luftë nuk e kam njoftë”, tha Hoxha duke u përgjigjur në pyetjen e mbrojtjes së Pjetër Shalës, përmes avokatit Jean-Louis Gilissen, për Time Kadrijajn.
Ndërsa, për Safete Hadergjonajn, dëshmitari Hoxha tha se tani e njeh pasi që është fytyrë publike. I pyetur për një person me mërin Ilir Blakaj, dëshmitari tha se nuk e njeh.
Dëshmitari Zijadin Hoxha është pyetur për uzinën e metalit në Kukës nga mbrojtja e Pjetër Shalës, avokatit, Jean-Louis Gilissen.
I pyetur se a është në gjendje që të përshkruaj uzinën e metalit në Kukës, dëshmitari tha se mund ta bëjë afërsisht. “Mundet me ndodh qe qind për qind nuk mundem me ua përshkruar, por afërsisht po”, tha Hoxha.
Në fillim të seancës, trupi gjykues kundërshtoi kërkesën e mbrojtjes së Shalës që të zgjasë afatin për marrjen në pyetje të dëshmitarit Zijadin Hoxha.
Sipas kryetares së trupit gjykues, Mappie Veldt-Foglia pyetjet për këtë dëshmitar do t’i vazhdojë edhe përfaqësuesit e Zyrës së Prokurorit të Specializuar dhe pastaj avokati që përfaqëson viktimat në këtë çështje gjyqësore.
Gjyqtarja Veldt- Foglia tha se pyetje për këtë dëshmitarë mund të kenë edhe anëtarët e trupit gjykues. Sipas kryetares së trupit gjykues, dëshmia e këtij dëshmitari do të zgjasë edhe gjatë ditës së nesërme.
