Forcat Ajrore të Shqipërisë kanë hapur dyert për pilotët e Forcës së Sigurisë të Kosovës (FSK) për trajnim në pilotim me helikopterë. Këtë njoftim e ka publikuar në rrjetin social Facebook, ministri shqiptari Mbrojtjes, Niko Peleshi, i cili edhe publikoi disa fotografi nga baza Ajrore e Shqipërisë në Farkë.
“Forca Ajrore shqiptare hap dyert për pilotët e Forcës së Sigurisë së Kosovës. Pilotët e FSK-së do të ndjekin në Bazën Ajrore të Farkës programin e rifreskimit teorik dhe praktik të fluturimeve me helikopter, i detyrueshëm për ekuipazhet për të mbajtur reflekset e fluturimit”, ka shkruar ministri Peleshi.
E menjëherë pas publikimit të fotografive nga trajnimi në Farkë, ka reaguar ministri kosovar i Mbrojtjes, Ejup Maqedonci, duke falënderuar homologun Peleshi për rritje të bashkëpunimit.
“Mirënjohës për vullnetin dhe përkushtimin e ministrit Niko Peleshi për të rritur bashkëpunimin dhe për të mbështetur FSK-në në ndërtimin e kapaciteteve të reja”, ka shkruar Maqedonci.
Kujtojmë se dy ushtritë kanë vazhduar me bashkëpunim në shumë fusha. Në shtator të këtij viti, ekipet e kërkim-shpëtimit të Forcave të Armatosura të Shqipërisë dhe ato të Forcës së Sigurisë së Kosovës zhvilluan stërvitje të përbashkëta.
