Kryetari i Lidhjes Demokratike të Kosovës, Lumir Abdixhiku, ka njoftuar se kanë rifilluar punimet në “Rrugën A” në Prishtinë. Ai ka thënë se shkalla e dytë e Komerciales ka rrëzuar vendimin skandaloz të “gjykatëses familjare”. Abdixhiku, përmes një postimi në Facebook, ka njoftuar se shkalla e dytë e ka rrezuar vendimin, sepse ka qenë joprofesional dhe shkelje e rëndë. “Vendimet e urdhëresave politike s’mund të përfundojnë ndryshe. Popullistët, me gjithë mllefin e urrejtjen që bartin për punën e tjetrit na humbën veçse kohë. Do të duhej të kishin brenga tjera, do të duhej të kishin qëllime të tjera; sepse vendi ka nevoja plot. Ne vazhdojmë; ekipit të Kryeqyteti u themi puna e mbarë ju qoftë; e qytetarët e Prishtinës megjithatë nuk do të harrojnë”, ka shkruar Abdigjiku. Edhe Përparim Rama, kryetari i Prishtinës, ka thënë se ka një lajmë të mirë për kryeqytetin. “Edhe Lajm i mirë për Kryeqytetin! Rinisin punimet në rrugën “Jim Xhema” (Rruga A). Dhoma e Shkallës së Dytë të Gjykatës Komerciale aprovon ankesat tona dhe shfuqizon vendimin e Shkallës së Parë për shtyrjen e ekzekutimit të vendimit”, ka shkruar Rama, në Facebook. Kujtojmë se një ditë më parë shkalla e dytë e Gjykatës Komerciale ka rrëzuar aktvendimin për pezullimin e punimeve në këtë rrugë.

12 profile të reja studimi në 21 shkolla të mesme të 14 komunave të Kosovës, janë krejt çka do të ofrojë mësimi dual, i cili u promovua në fushatën “Mësimi dual: Mundësi për punësim dhe vetëpunësim të të rinjve” e organizuar nga Ministria e Arsimit, Shkencës dhe Teknologjisë.

Kryeministri Albin Kurti, gjatë fushatës theksoi se aftësimi dhe arsimi profesional janë thelbësore për ndërtimin e shtetit.

“Lansimin e kësaj fushate e bëj me besim se shteti ynë është në rrugën e rritjes dhe të zhvillimit të qëndrueshëm. Duke zhvilluar sistemin dual në 12 profile, në 21 shkolla, në 14 komuna të Kosovës ne nuk do të plotësojmë vetëm vendet e lira të punës, por po ndërtojmë themelin për të mësuarit gjatë gjithë jetës”, ka deklaruar kryeministri.

Ministrja e Arsimit, Arbërie Nagavci ka thënë se arsimi dual është një mundësi edhe për zhvillimin e bizneseve vendore, si vende ku do të kryhen praktika të drejtimeve të ndryshme.

“Arsimi dual përshtatet më së miri me kohën dhe zhvillimet aktuale, duke i zhvilluar nxënësit tonë në disa drejtime, ku çdo drejtim është aq i vlefshëm dhe e plotëson njëri tjetrin në mënyrë efektive”, ka thënë Nagavci.

Ambasadori gjerman në Kosovë, Jorn Rohde, ka thënë se mësimi dual mundëson përgatitje të të rinjve për tregun e punës dhe për vetpunësim.

“Ajo që është urgjentisht e nevojshme është zbatimi i kësaj fushate. Gjermania po investon në sistemin AAP, në infrastrukturën në Kosovë. Për çdo vit gjysmë million të rinj fillojnë arsim profesional për dy – tre vite, këta nxënës e kanë teknologjinë e fjalës së fundit ku mësojnë shkathtësi të veçanta”, ka thënë Rohde.