Misioni i OSBE-së në Kosovë, në bashkëpunim me Këshillin e Evropës, si dhe me përkrahjen e Kuvendit, do të organizojë të mërkurën në Prishtinë një panel të nivelit të lartë mbi rolin e Kuvendit në monitorimin e zbatimit të “Konventës së Stambollit” dhe legjislacionit që lidhet me dhunën në familje dhe dhunën me bazë gjinore.
Sipas njoftimit, ky organizim i paraprinë “16 Ditëve të Aktivizmit kundër Dhunës me Bazë Gjinore”, si dhe bën bashkë, deputetë, përfaqësues të qeverisë, organizata të shoqërisë civile, institucione ndërkombëtare dhe organizata aktive në fushën e luftimit të dhunës ndaj grave dhe dhunës në familje.
Përmes diskutimeve dhe prezantimeve nga ekspertë e profesionistë të shquar të fushës, kjo ngjarje pritet të trajtojë modalitetet për përforcimin e instrumenteve institucionale për monitorimin e zbatimit të Konventës së Stambollit, duke përfshirë detyrimin për krijimin e një mekanizmi përkrahës institucional midis aktorëve kryesorë si dhe përgjatë niveleve të ndryshme të qeverisjes.
Fjalët hyrëse do të mbahen nga Saranda Bogujevci, nënkryetare e Kuvendit të Kosovës, Albulena Haxhiu, ministre e Drejtësisë dhe koordinatore për Mbrojtje nga Dhuna në Familje, Dhuna ndaj Grave dhe Dhuna me Bazë Gjinore, ambasadori Michael Davenport, shef i Misionit të OSBE-së në Kosovë, si dhe Frank Power, shef i Zyrës së Këshillit të Evropës në Prishtinë.
