Më shumë se 200 persona u dënuan me 2200 vjet burg në një nga gjyqet më të mëdha kundër anëtarëve të mafias të mbajtur ndonjëherë në Itali.
Gjyqi zgjati tre vjet dhe ata u dënuan për lidhjen e tyre me ‘Ndrangheta’, një nga organizatat kriminale më me ndikim në Evropë.
Ata u dënuan për krime të ndryshme, nga zhvatja deri te trafiku i drogës.
Rasti tregoi se sa i përhapur është ndikimi i mafies në shoqërinë dhe politikën e Italisë së Jugut.
Në mesin e të dënuarve janë të ashtuquajturit jakë të bardhë – zyrtarë lokalë, biznesmenë dhe politikanë, gjë që tregon ndikimin e gjerë të krimit të organizuar në institucione.
Ndër të tjera, u dënua Giancarlo Pitelli, avokat dhe ish-senator i partisë Forza Italia (Përpara Italisë) i ish-kryeministrit Silvio Berlusconi , i cili vdiq më 12 qershor 2023 .
Pitelli mori 11 vite burg për përfshirje në biznesin mafioz.
Mes të dënuarve ka nëpunës civilë, profesionistë nga sfera të ndryshme biznesi dhe zyrtarë të lartë, të cilët ishin kyç për infiltrimin e ‘Ndranghetës’ në ekonomi dhe në institucionet shtetërore.
Më shumë se 100 të akuzuar u shpallën të pafajshëm.
Gjyqtarët që dhanë vendimin u vunë nën mbrojtjen e policisë.
Me origjinë në rajonin e varfër të Kalabrisë, ‘Ndrangheta konsiderohet një nga organizatat kriminale më të rrezikshme në botë.
Vlerësohet se ajo kontrollon deri në 80 për qind të tregut evropian të kokainës, me një xhiro vjetore prej rreth 60 miliardë dollarësh.
Gjyqi u mbajt në periferi të qytetit të Lamecija Terme, në një sallë gjyqi shumë të siguruar, të pajisur me kafaze për të akuzuarit dhe mjaft të madh për të akomoduar rreth 600 avokatë dhe 900 dëshmitarë.
Ndër akuzat ndaj tyre ishin vrasje, zhvatje, trafik droge, përvetësim, shpërdorim detyre dhe pastrim parash.
Gjyqi tregoi se si mafia kalabreze ishte zgjeruar, duke u infiltruar në ekonominë lokale, institucionet publike dhe madje edhe sistemin shëndetësor, duke manipuluar tenderët publikë dhe duke dhënë ryshfet zyrtarët vendas.
Në gjyqin, më i madhi i këtij lloji që nga vitet 1980, gjyqtarët kaluan mijëra orë duke pyetur dëshmitarët.
Ish-mafiozët, të cilët u bënë dëshmitarë-bashkëpunëtorë, folën për aktivitetet e familjes Mancuso dhe bashkëpunëtorëve të tyre, të cilët kanë një kontroll të madh në provincën e Vibo Valentia.
Familja Mancuso, nga qyteti i Limbadi, është një nga më të fuqishmit nga 150 klanet që përbëjnë ‘Ndrangheta’.
“Gjyqi tregoi se mafia tradicionalisht është më e lidhur me aktivitete kriminale si zhvatja apo trafiku i drogës,” thotë Anna Sergi, profesore e kriminologjisë në Universitetin e Exeter.
“Megjithatë, është e rëndësishme të theksohet se njerëz nga mjedise të ndryshme, si ‘punëtorët e jakës së bardhë’, ishin të përfshirë në mafi, e cila ofron një pamje më të plotë të lidhjeve midis klaneve mafioze,” shtoi ajo.
Shumica e të akuzuarve u arrestuan në dhjetor 2019, pas një hetimi të gjerë në të paktën 11 rajone italiane.
Rreth 2,500 oficerë policie morën pjesë në bastisjet në Vibo Valentia, një zonë e kontrolluar kryesisht nga klani Ndragueta Mancuzo.
Më shumë se 50 ish-anëtarë të mafias kanë rënë dakord të bashkëpunojnë me gjykatën, duke përfshirë edhe nipin e Luigi Mancuso, Emanuele.
Gjyqi zbuloi se anëtarët e Ndrangheta dyshohet se kishin fshehur armë në kapelat e varrezave, përdornin ambulanca për të transportuar drogë dhe devijonin furnizimet publike me ujë për të rritur marijuanën.
Personat që iu kundërvunë një grupi të organizuar kriminal u përballën me pasoja dhe kërcënime të rënda – gjetën një qenush ose kokë dhie të ngordhur në pragun e shtëpisë së tyre, u dogjën makinat dhe u thyen xhamat.
“Kjo tregon se sa sfiduese është lufta kundër ‘Ndrangheta’s për shkak të lidhjeve të saj politike, ekonomike dhe financiare,” thotë Antonio Nicasso, autor dhe ekspert për krimin e organizuar.
