Kryeministri i Kosovës, Albin Kurti zhvilloi një takim me shefin e Misionit të OSBE-së në Kosovë, Michael Davenport, njofton Zyra e Kryeministrit.
Sipas njoftimit, ata diskutuan për progresin në fushat e përbashkëta të bashkëpunimit ndërmjet Qeverisë së Kosovës dhe zyrës së OSBE-së në Kosovë, veçmas në fushën e të drejtave të komuniteteve jo shumicë në vend.
Kryeministri Kurti theksoi përkushtimin e shtuar të qeverisë ndaj komuniteteve jo shumicë dhe rritjen e mbështetjes për Ministrinë për Komunitete dhe Kthim (MKK), si dhe angazhimin konstant me Zyrën për Çështje të Komuniteteve në Zyrën e Kryeministrit dhe Zyrën e Komisionerit për Gjuhë.
U diskutua edhe për tema të tjera aktuale. Sa i përket kërkesës së Serbisë për mbajtje të zgjedhjeve në territorin e Republikës së Kosovës, Kurti theksoi se, siç ka njoftuar shefin e OSBE-së në përgjigjen e 17 nëntorit, për këtë është e nevojshme një marrëveshje ndërshtetërore dhe se kërkesa për një marrëveshje të tillë duhet të vijë nga Serbia, si palë e interesuar.
