Nënsekretari i Thesarit të Shteteve të Bashkuara për Inteligjencën Financiare dhe Kundër Terrorizmit, Brian Nelson do të vizitojë Ankaranë për të bindur Turqinë që të mbështesë sanksionet kundër Rusisë dhe grupit palestinez Hamas, të cilësuar si grup terrorist nga Shtetet e Bashkuara, Bashkimi Evropian dhe vende të tjera anembanë botës. Këtë e raporton Bloomberg , duke cituar burime.
Qeveria amerikane përfshiu më parë në listat e sanksioneve kompanitë turke që ofronin shërbime financiare për grupin palestinez dhe gjithashtu asistuan kompanitë ruse në anashkalimin e kufizimeve.
Turqia deri më tani nuk ka mbështetur asnjë sanksion kundër Rusisë përveç atyre të vendosura nga OKB-ja. Ankaraja nuk e njeh Hamasin si një organizatë terroriste, ndryshe nga SHBA dhe BE. Presidenti turk Rexhep Tajip Erdogan më parë i quajti xhihadistët luftëtarë për çlirimin e popullit palestinez, kështu që është e paqartë se cili do të jetë rezultati i negociatave të Nelson me qeverinë turke, vëren agjencia.Në të njëjtën kohë, Ankaraja po kërkon të përmirësojë marrëdhëniet me Uashingtonin dhe të marrë mbështetjen e presidentit amerikan Joe Biden për blerjen e avionëve luftarakë F-16. Turqia gjithashtu ka ndërmarrë hapa për të lehtësuar shqetësimet perëndimore dhe në fillim të këtij viti ndaloi transitin e mallrave që i nënshtrohen sanksioneve të BE-së dhe SHBA-së drejt Rusisë, megjithëse vendimi nuk u shpall kurrë publikisht, tha Bloomberg.
