Kryeministri i vendit, Albin Kurti ka shpërndarë një video që përmbledh takimin me këngëtaren e famshme shqiptare, Rita Ora, e cila për datëlindjen e saj erdhi në vendlindje së bashku me bashkëshortin e saj, regjisorin, Taika Waititi.
Sipas postimit të Kurtit, pjesë e diskutimit ka qenë fusha e kulturës, specifikisht filmi.
“Diskutim për art, kulturë dhe film, për çfarë është bërë, për çka mund të bëjmë bashkë, me Rita Orën që festonte ditëlindjen, e rrethuar me njerëz krenar për të arriturat e saj”, ka shkruar Kurti, i cili ka ndarë pamje të festimit të datëlindjes së këngëtares në kabinetin e tij.
Rita Ora shfaqet në këtë video duke dhënë mesazhin se dëshira e saj më e madhe është të inspirojnë gjeneratat e reja të Kosovës.
“Është shumë e rëndësishme të kujtosh prej nga vjen. Unë jam rritur me idenë e ‘luftës’ që duhet ta bëj si grua, veçanërisht si grua që ka migruar nga Prishtina në Londër. Për shumë vite kam qenë avokuese e kësaj çështje dhe tash është shumë e bukur të shohësh kaq shumë gra të suksesshme, veçmas nga Kosova”, ka thënë Rita Ora.
Pjesë e takimit kanë qenë edhe ministri i Kulturës, Hajrulla Çeku dhe drejtoresha e Qendrës Kinematografike të Kosovës, Blerta Zeqiri.
