Ministri i Brendshëm Xhelal Sveçla, ka reaguar lidhur me protestën e njësiteve elitare të Policisë së Kosovës, të mbajtur sot para ndërtesës së Qeverisë. Ai është shprehur se Ministria e Brendshme ka bërë maksimumin e mundësive për të trajtuar secilin njësit të Policisë së Kosovës, ashtu siç e meriton.
Ministri Sveçla, përmes rrjetit social Facebook, ka bërë të ditur angazhimin e ministrisë, të cilin e drejton ai, për përmirësimin e kushteve të punës, si dhe ngritjen e kapaciteteve në luftën kundrejt krimit të organizuar dhe të korrupsionit.
“E gjithë përpjekja jonë është që me mundësitë që kemi të ulim pabarazinë edhe brenda profesionit edhe mes profesioneve të ndryshme. Në qasjen tonë, paga asnjëherë nuk ka qenë e shkëputur nga kushtet e tjera të punës që përbëjnë një aspekt esencial të trajtimit të punëtorëve të secilit sektor, ndër këta sigurisht edhe Policia e Kosovës”, ka shkruar Sveçla.
Ai, mes tjerash, përmendi edhe rritjen e buxhetit për Policinë e Kosovës, ku, sipas tij, kjo është bërë në masën 30% , ndërkaq në investime kapitale rritja është prej 300% derisa buxheti për pajisje operacionale, sipas ministrit Sveçla,që ka qenë më pak se gjysmë milioni, sot është mbi 9 milionë euro apo 21-fish më shumë.
Ministri Sveçla përmendi edhe shërbimet shëndetësore, që është arritur të bëhet përmes një marrëveshjeje me Ministrinë e Shëndetësisë.
“Bashkë me Ministrinë e Shëndetësisë dhe ShSKUK-në kemi nënshkruar marrëveshjen e bashkëpunimit përmes së cilës të gjitha shërbimet shëndetësore në të gjitha rajonet e Kosovës, do të ofrohen për zyrtarët policorë me prioritet dhe pa asnjë pagesë”, ka shkruar Sveçla.
Ndërkaq për Njësitë Speciale, sipas ministrit Sveçla, ka pasur dhe vazhdojnë ta kenë mbështetjen më të madhe, si në aspektin financiar, ashtu edhe me ngritjen në strukturë.
“Si Ministri e Punëve të Brendshme për detyrë e kemi të mendojmë e përkujdesemi për tërësinë dhe kështu duke u lëshuar në secilën prej 9 agjencive ekzekutive e pastaj trajtim specifik për njësitë përbrenda secilës agjenci veç e veç, gjithnjë duke pasur parasysh mundësitë reale dhe qasjen e drejtë”, vuri në dukje ministri Sveçla, teksa shtoi se është bërë maksimumi që përbrenda mundësive të trajtohet secili njësit i Policisë së Kosovës, ashtu siç e meriton.
