Lirohen edhe 22 tifozë të tjerë kroatë nga burgjet greke

22 shtetas të tjerë kroatë janë liruar nga burgjet greke, njofton Ministria e Punëve të Jashtme dhe Evropiane.

Natyrisht, bëhet fjalë për tifozët e Dinamo Bad Blue Boys, të cilët u arrestuan për trazirat në Athinë ku mbeti i vrarë një tifoz grek.

Tani janë liruar gjithsej 63 tifozë kroatë.

“Kaucionin i paguar nga avokatët”

“Gjithashtu është ofruar mundësia e pagesës së kaucionit me kthim të mëvonshëm, për të përshpejtuar procedurat, por një ofertë e tillë nuk është shfrytëzuar duke pasur parasysh se garancia është paguar nga avokati.

Ambasada e Republikës së Kroacisë në Athinë deri më tani ka ofruar ndihmë financiare për blerjen e biletave të avionit dhe shpenzimet tjera të kthimit në Kroaci për 38 shtetas kroatë, ndërsa për 14 prej tyre janë lëshuar pasaporta, transmeton Index.hr.

Qeveria, përmes Ambasadës kompetente, vazhdon të ndihmojë qytetarët kroatë dhe të mbajë komunikimin në të gjitha nivelet me organet greke”, tha MVEP.