Në vazhdën e vizitave që po zhvillon në Shtetet e Bashkuara të Amerikës, ministri i Mbrojtjes, Ejup Maqedonci është pritur sot në Departamentin amerikan të Mbrojtjes, nga ku mori mbështetje për zhvillimin e FSK-së dhe bashkëpunimin e ngushtë me ShBA-të. Ai tha se Shtetet e Bashkuara të Amerikës mbeten partneri kryesor dhe strategjik Kosovës.
Në Departamentin Amerikan, Maqedonci u prit nga zëvendëssekretarja e Mbrojtjes, Sasha Baker.
Po ashtu, ministri kosovar pati takime dhe me ndihmëssekretaren e Mbrojtjes për Çështje Ndërkombëtare të Sigurisë, Celeste Wallander, ndihmëssekretaren e Mbrojtjes për Evropë dhe NATO, Lisa Sawyer, si dhe zyrtarë të tjerë të lartë të Departamentit të Mbrojtjes, njofton Zyra për Informim me MB.
Në takim është diskutuar për raportet bilaterale ushtarake, planin e tranzicionit, mundësitë për rritjen e bashkëpunimit në aspektin e trajnimeve dhe ushtrimeve të përbashkëta si dhe konsultimet rreth planit bilateral të mbrojtjes që do të diskutohet në fillim të vitit 2024.
Zëvendëssekretarja Baker, sipas të njëjtit njoftim, ka shprehur mirënjohje për kontributin e Kosovës për stabilitetin e regjionit të Ballkanit Perëndimor, si dhe mbështetjen që Kosova po jep për luftën e drejtë të popullit të Ukrainës kundër agresionit rus.
“Gjithashtu, në takim u ri konfirmua synimi i përbashkët për të thelluar bashkëpunimin në fushën e mbrojtjes si dhe vazhdimin e koordinimit të përbashkët për të kontribuar për paqen dhe sigurinë në regjion dhe më gjerë”.
Vizitën në Departamentin e Mbrojtjes ministri Maqedonci e vazhdoi me takimin me ndihmëssekretarin e Ushtrisë së ShBA-së për blerje ushtarake, logjistikë dhe teknologji, Douglas Bush. “Shtetet e Bashkuara të Amerikës mbeten partneri ynë kryesor strategjik”, tha në fund Maqedonci. /Kosovatimes/
