Çeku rendit të arriturat e MKRS-së në arkeologji

Ministri i Kulturës, Hajrulla Çeku, ka thënë se arkeologjia ka pasur vëmendje të veçantë nga ky institucion në vitin e zbulimit të madh, mbishkrimit të Perandorit Justinian në qytetin dardan të Ulpianës.

Sipas tij projekti i gërmimeve në bashkëpunim me Francën dhe Italinë po vazhdon drejt zbulimeve të reja, teksa ka numëruar edhe disa prej projekteve dhe të arriturave të kësaj ministrie.

“Për herë të parë kemi nisur shpronësime në lokalitete arkeologjike. Ulpiana dhe Dresniku me prioritet, për të vazhduar me shpronësime në lokalitetet tjera. Gjatë vitit kemi përfunduar rehabilitimin e lokalitetit arkeologjik në qendër të Prizrenit, i cili kishte një dekadë që rrinte pa u trajtuar. Po ashtu në Prizren investuam në kurimin profesional dhe prezantimin modern të koleksionit të Muzeut Arkeologjik. Pas Kalasë së Prizrenit edhe Parku arkeologjik Ulpiana bëhet me plan menaxhimi”, ka shkruar Çeku në Facebook.

Sipas Çekut një ekip profesionistësh vendorë e nga jashtë hartuan analizën e dëmeve në Kalanë e Novobërdës.

“Mbi të po hartojmë projektin e ndërhyrjeve për konsolidim e prezantim të këtij lokaliteti. Me gjashtë akte nën-ligjore kompletuam legjislacionin e trashëgimisë kulturore. Një nga to është edhe rregullorja për gërmime arkeologjike. Standarde profesionale të munguara për kohë të gjatë. Muzeu i Kosovës u bë pjesë e ekspozitës “First Kings of Europe” në Shtetet e Bashkuara, ku po ekspozohet një pjesë e thesarit arkeologjik të Kosovës”, ka shtuar ministri i Kulturës.

Tutje ai ka thënë se me Shtetet e Bashkuara nisën edhe projektin e trajtimit të mëtejmë të lokalitetit arkeologjik në Dresnik të Klinës.

“Po mobilizojmë energji shtesë për një vit edhe më intensiv në arkeologji. Me plan ambicioz pune e buxhet të rritur, Instituti Arkeologjik i Kosovës do ta ketë mbështetjen e plotë.  Vlera që kemi ndarë për arkeologjinë në kornizën buxhetore 2024-2026 është afër tre milionë euro. Krahas Ulpianës, Dresnikut e Novobërdës, në planin e ndërhyrjeve për 2024 janë edhe lokalitetet e Vlashnjës, Vuçakut, Pogragjës, Kastërcit, Korishës dhe të tjera”, ka nënvizuar Çeku.