Ministrja e Arsimit, Shkencës, Teknologjisë dhe Inovacionit, Arbërie Nagavci, ka paralajmëruar se Ligji i ri për rregullat në trafik do të ketë dënime shumë më të ashpra sesa ligji aktual.
Një paralajmërim të tillë ministrja Nagavci e ka bërë në një reagim të saj pas vdekjes së tre të rinjve në një aksident në autostradën “Ibrahim Rugova”, në afërsi të Prizrenit.
“Një veprim i jashtëligjshëm, mosrespektimi i rregullave dhe sjellja e papërgjegjshme e disa të rinjëve mbrëmë, la pasoja tragjike për viktimat Lordi Syla, Molos Delija dhe Nue Bibaj. Ngushëllimet më të sinqerta familjeve Syla, Delija dhe Bibaj, të afërmve e miqve, për humbjen e më të dashurve të tyre. Lutem që të gjejnë forcë për ta përballuar këtë dhimbje të madhe. Të lënduarve ju dëshiroj shërim të shpejtë e të plotë. Respektimi me përpikëri i rregullave në trafik, parandalon rrezikun për aksidente në komunikacion, ndërkaq Ligji i ri për Rregullat në Trafik do të ketë dënime shumë më të ashpra sesa Ligji aktual në fuqi”, ka theksuar Nagavci në një postim në Facebook. /Kosovatimes/
