Ministri i Mbrojtjes, Ejup Maqedonci, së bashku me ambasadorin Blerim Reka, kryetarin e shoqatës “Atlantiku” dhe anëtarë të kësaj shoqate, bënë homazhe te varrezat ku prehen dëshmorët e lirisë, vëllezërit Yll, Agron dhe Mehmet Bytyqi, në Nju Jork.
“Babai i tre dëshmorëve Bytyqi, Agron Bytyqi, ndjenjën e mungesës të tre djemve të tij nuk mund ta largojë asnjëherë, por është ngushëllues fakti që jeta e tyre ishte e shkurtër nga vitet, por e pavdekshme nga pesha, heroizmi i tyre me lavde do të mbahet mend gjithmonë”, u shpreh me këtë rast ministri Maqedonci.
Pas homazheve, ministri Maqedonci bashkë me kryetarin Gani Shehu dhe anëtarët e Shoqatës Atlantiku, trashëgimtare e Batalionit Atlantiku të UÇK-së, zhvilluan një bashkëbisedim, gjithnjë me temë qendrore për Kosovën dhe mundësinë e kontributit të Shoqatës Atlantiku në mbështetje të institucioneve tona.
Kujtojmë se vëllezërit Bytyqi ishin anëtarë amerikano-kosovarë të Ushtrisë Çlirimtare të Kosovës, të cilët u vranë nga policia serbe menjëherë pas përfundimit të luftës në Kosovë. Agron (23), Mehmet (21) dhe Ylli Bytyqi (25) u lindën në Çikago dhe jetuan në Nju Jork.
Në korrik 1999, dhe menjëherë përfundimit të sulmeve të NATO-s ndaj Serbisë, ata ndihmuan fqinjët e tyre, një familje rome nga Prizreni të kthehen në Serbi, ndërsa u arrestuan nga forcat serbe. Trupat e tre vëllezërve u zbuluan në korrik 2001 në një varr masiv që përmbante 70 shqiptarë, pranë objektit të trajnimit të Njësisë Speciale Anti-Terroriste (SAJ). Trupat u gjetën me duar të lidhura dhe me plagë me armë zjarri në kokë. /Kosovatimes/
