Deputetja e Lëvizjes, Vetëvendosje, Fitore Pacolli, ka dorëzuar padi kundër kryetarit të LDK-së, Lumir Abdixhikut, kryetarit të Prishtinës, Përparim Rama dhe deputetes së LDK-së, Doarsa Kica-Xhelilit.
Deputetja Pacolli pas dorëzimit të padisë, ka theksuar se padia ka të bëjë më shpifjet dhe denigrimin që këta të fundit i kanë bërë lidhur me projektin e rrugës A.
“Me statuset e tyre publike kanë nxitur opinioni publik, kundër meje, kanë nxitur qytetarët e Prishtinës të reagojnë kundër meje pa pasur asnjë fakt dhe në mënyrë shumë të padrejtë. Unë pres që Gjykata ta shqyrtojmë me kujdes lëndën time”, ka theksuar ajo.
Duke komentuar ndërlidhjen me motrën e saj në këtë çështje, Pacolli, ka thënë se të dyja vetëm po e bëjnë punë profesionale. Sipas saj, afërsinë e tyre po e shfrytëzojnë për qëllime politike.
“Ajo e ka pasur rastin e Rrugës A, ju e dini që rastet ndahen me rend. Ne presim që Gjykata të merr vendim”, ka thënë deputetja Pacolli.
Vendimi i Gjykatës Komerciale për pezullimin e punimeve në rrugën A, nga zyrtarë të LDK-së ishte thënë se është bërë me motive politike, duke përmendur se këtë rast e ka pasur gjyqtarja Vlora Pacolli, motra e deputetes së LVV-së, Fitore Pacolli.
