Pasi dështoi takimi ndërmjet presidentes së Kosovës, Vjosa Osmani, me kryetarin e AAK-së, Ramush Haradinaj, ka reaguar së fundi edhe Presidenca e Kosovës. Sipas kësaj të fundit, takimi ishte paraparë të mbahet sot, por për shkaqe protokollare të presidentes Osmani nuk është realizuar.
“Z. Haradinaj nuk ka dashur të presë derisa protokolli e ka njoftuar Presidenten për arritjen e tij. Pavarësisht kësaj, presidentja Osmani ka lënë të hapur mundësinë e takimit ditëve në vazhdim, kurdo që kreu i AAK-së e vlerëson se duhet diskutuar dhe adresuar çështjet e rëndësisë nacionale. Dera e Presidencës vazhdon të mbetet e hapur”, ka deklaruar Bekim Kupina, këshilltar për Media i presidentes Osmani.
E më herët ka pas deklarim edhe nga partia e Haradinajt. Sipas AAK-së, kryetari Ramush Haradinaj dhe sekretari i përgjithshëm, Muharrem Nitaj, ishin në Presidencë në orarin e përcaktuar nga presidentja Osmani, por kjo e undit sipas AAK-së, nuk e ka respektuar orarin e caktuar nga vetë ajo.
Kujtojmë se presidentja Vjosa Osmani, dje ka nisur takimet konsultative me partitë politike në vend për situatën e përgjithshme politike e me theks të veçantë për Draftstatutin e Asociacionit të komunave me shumicë serbe. Osmani u takua me kryetarin e LDK-së, Lumir Abdixhiku, ndërsa u refuzua takimi me kreun e PDK-së, Memli Krasniqi.
