Ministrja e Drejtësisë, Albulena Haxhiu, në takimin e Këshillit për Demokraci dhe të Drejta të Njeriut, ka folur për ndryshimet në kodin penal dhe kodin e procedurës penale.
“Kemi mundësuar që përveç rasteve kur gjykata shpall fajtor dikë për dhunë në familje apo dhunë seksuale, të marrë edhe dënim plotësues që ia ndalon të drejtën e kandidimit në çdo pozitë publike nga 3 deri në 10 vite për personin që shpallet fajtor”, ka deklaruar e para e drejtësisë.
Haxhiu ka thënë se ka tendenca për ta penguar jetësimin e reformave në drejtësi.
“Është hera e parë që Qeveria e Kosovës po bashkëpunon me Komisionin e Venecias për reformën në drejtësi. Kur kemi opinionin pozitiv nga Komisioni, siç janë çështjet Këshilli Prokurorial, vettingu, Byroja për konfiskimin e pasurisë, cili është kuptimi të dërgohen në Gjykatën Kushtetuese. Përgjigja është se ka tendenca të vazhdueshme për ta penguar jetësimin e reformave në drejtësi”, ka thënë ministrja Haxhiu.
Sveçla: Policia e Kosovës është sulmuar 100 herë nga grupet ekstremiste
Ministri i Punëve të Brendshme, Xhelal Sveçla, në takimin e Këshillit për Demokraci dhe të Drejta të Njeriut, ka deklaruar se sfida më e madhe ka qenë ruajtja e integritetit territorial dhe e sigurisë publike.
“Gjatë këtyre viteve Policia e Kosovës është sulmuar rreth 100 herë nga këto grupe ekstremiste dhe lajmi i fundit është që një sulm e kemi pasur ditën e djeshme ku është rrezikuar jeta e një pjesëtari të policisë, megjithatë situata atje është përmirësuar ndjeshëm, për disa qarqe edhe pabesueshëm mirë”, ka deklaruar Sveçla.
Tutje ai ka thënë se Policia e Kosovës gjatë periudhës janar – nëntor, ka iniciuar 46.050 raste, prej të cilave 26.334 kanë qenë vepra penale.
“Falë angazhimit dhe mbështetjes së të gjithëve, është arritur neutralizimi i grupeve kriminale, që pak a shumë ka qenë i njëjti kontingjent i angazhuar në barrikada, në kontrabanda, shtypjen e vullnetit të qytetarëve atje, por edhe në sulme ndaj Policisë së Kosovës”, ka thënë ministri i MPB-së.
Gërvalla: Pritja e ndërkombëtarëve për veriun – refuzim i qytetarëve serb ndaj institucioneve
Ministrja e Punëve të Jashtme, Donika Gërvalla, në takimin e Këshillit për Demokraci dhe të Drejta të Njeriut, ka folur për imazhin e krijuar të veriut të Kosovës.
“Shumë përfaqësues të shteteve të ndryshme të cilët kanë vizituar Kosovën edhe veriun gjatë muajve të fundit, të cilët kanë shprehur habi sesa jo vetëm të pranishme por edhe të pranueshme janë institucionet tona të sigurisë në veri. Pritjet e tyre janë që ka një refuzim total të qytetarëve serb ndaj pranisë së institucioneve të sigurisë dhe drejtësisë si të padëshirueshme, ndërkaq eksperienca e tyre është krejt ndryshe”, ka thënë ajo.
Gërvalla ka thënë se vetëm me koalicion gjithpërfshirës mund të ndodh parandalimi i dhunës.
“Na nevojitet një koalicion mbarëshoqëror për parandalimin e dhunës ndaj vajzave dhe grave, nuk mjaftojnë reformat, por koalicioni duhet të jetë i përfshirë nga mediat, institucionet e sigurisë, besimin ndaj tyre, reformën e domosdoshme ndaj institucioneve të drejtësisë”, ka thënë ajo.
