Kuvendi i Shqipërisë, i ka hapur rrugë Strukturës së Posaçme kundër Korrupsionit dhe Krimit të Organizur (SPAK) për arrestimin e ish-kryeministrit Sali Berisha. Ky i fundit u “zhvesh” nga imuniteti i deputetit. Deputetët e mazhorancës votuan me 75 vota pro, dy raportet e votuara nga Këshilli për Mandatet dhe Imunitetin më 18 dhjetor.
Por, ndonëse një prej këtyre raporteve ishte i deputetit demokrat Enkelejd Alibeaj, ky i fundit nuk ka qenë pjesë e seancës për votimin për heqjen e imunitetit të Sali Berishës.
Një tjetër figurë demokrate, kreu i PD-së, Lulzim Basha nuk ka marrë pjesë në punimet e sotme të Kuvendit, ndërsa pjesë e seancës kanë qenë aleatët e Berishës, Fatmir Mediu, Vangjel Dule e Agron Duka.
Në nisje të seancës, mes tensionit e kaosit, kryeparlamentarja Lindita Nikolla i ka dhënë fjalën ish-kryeministri Berisha, por ky i fundit nuk ka pranuar të flasë.
Me votimin e sotëm, Kuvendi i hapi rrugë Strukturës së Posaçme kundër Korrupsionit dhe Krimit të Organizuar për shtrëngim të masës së sigurisë, ndërsa nuk dihen ende nëse SPAK do të kërkojë “arrest me burg” apo “arrest shtëpie”.
Ish-kryeministri po hetohet në lidhje me privatizimin e ish-kompleksit Partizani, ndërsa për të ishte caktuar masa e sigurisë ‘detyrim paraqitje” dhe ndalim i daljes jashtë Shqipërisë”, masë kjo e cila nuk u zbatua nga Berisha.
Ky i fundit e konsideronte vendimin e SPAK si antikushtetues për shkak se nuk kishte marrë autorizim nga Kuvendi. Berisha refuzoi katër herë të paraqitej para oficerit të policisë gjyqësore, duke sjellë kështu reagim nga ana e SPAK, që kërkoi më pas shtrëngim të masës së sigurisë, duke dërguar në Kuvend kërkesën për heqjen e imunitetit ndaj deputetit.
Sot seanca për imunitetin e Berishës, tensione në Kuvendin e Shqipërisë
Ende pa nisur seanca plenare në Kuvendin e Shqipërisë, ku do të votohet mbi autorizimin për arrestimit e ish-kryeministrit Sali Berisha, opozita ka vijuar me të njëjtin skenar për të mos lejuar mbajtjen e saj.
Garda e Republikës është rreshtuar para foltores për të shmangur incidente, ndërsa ky veprim i tyre nuk është pritur mirë nga deputetët e opozitës.
Deputeti demokrat, Flamur Noka përmbysi karriget në sallë, ndërsa Gazment Bardhi u përplas me gardën duke kërkuar që të kalonte, transmeton RTSH.
Ndërkohë të tjerë deputetë mbështetës të Berishës janë mbledhur para godinë së Parlamentit, ku ka nisur protesta që po ashtu po shoqërohet nga tensione.
“O sot O kurrë”, deklaroi ish-kryeministri Sali Berisha nga salla e Kuvendit, teksa pas pak Kuvendi pritet t’i heqë atij imunitetin, duke i hapur rrugë SPAK për arrestimin e tij.
Ish-kryeministri e ka konsideruar kërkesën e SPAK dhe vendimin e Këshillit për Mandatet dhe Imunitetin si antikushtetues dhe një përpjekje e cila sikurse tha ai, do të dështojë.
Berisha theksoi se ky krim që po bëhet ndaj tij, nuk do e mposhtë kurrë opozitën e palëkundur.
