Policia e Kosovës në Mitrovicë të Veriut ka sekuestruar mjete të rrezikshme që do të mund të përdoreshin për sulme ndaj Policisë duke rrezikuar jetën e policëve dhe qytetarëve.
Sipas njoftimit, Policia e Kosovë me zyrtarët e saj dhe në bashkëpunim me qytetarët po punon në vazhdimësi me përkushtim dhe profesionalizëm në ruajtjen e rendit dhe garantimit të sigurisë së përgjithshme në gjithë territorin e vendit.
Sipas njoftimit të Policisë, njësitet kompetente, bazuar në informacionet e pranuara nga qytetarët, kanë ndërmarrë veprime të menjëhershme hetimore dhe operative në lagjen e Boshnjakeve në Mitrovicë. Gjatë kontrollit, autoritetet policore kanë gjetur: tela gjemborë të improvizuar, bomba tymi, municion dhe një uniformë. Uniforma e gjetur është e ngjashme me uniformat që janë përdorur nga grupi terrorist ne Banjskë më 24 shtator, thuhet në njoftim. Policia ende po i vazhdon veprimet policore operative në terren me qëllim të identifikimit të mjeteve tjera të dyshuara, dhe parandalimin e ndonjë sulmi të mundshëm kundër Policisë së Kosovës.
