Njëmbëdhjetë persona kanë humbur jetën dhe mbi 50 të tjerë janë lënduar sot në një aksident trafiku në veriperëndim të Turqisë, raportojnë mediat lokale.
Përplasja zinxhir përfshiu shtatë automjete, duke përfshirë tre autobusë dhe një kamion në autostradën e Marmarasë së Veriut pranë vendbanimit Dagdibi në provincën Sakarya, njoftoi agjencia e lajmeve Anadolu.
Shkaku i aksidentit ende nuk është përcaktuar, sipas agjencisë turke. Mediat raportojnë se zona është e mbuluar me mjegull të dendur dhe dukshmëria është e dobët.
Guvernatori i Sakaryas, Jasar Karadeniz, tha për mediat lokale se 57 persona u plagosën dhe u dërguan në spital dhe shtatë ishin në gjendje të rëndë.
“Sipas konstatimeve të para, numrin më të madh të viktimave në aksident e ka shkaktuar autobusi i tretë që ka goditur pasagjerët që kanë dalë nga automjeti. Policia ndodhet në vendngjarje dhe hetimet janë duke u zhvilluar”, ka thënë Karadeniz, raporton Haberturk.
